Түгэһиир нэһилиэгэр дойдубут күнүн бэлиэтиир тэрээһин хайдах ыытылынна? Сиһилии хаартысканан репортаһы көрүҥ, сэргээҥ.
Бу күн ураты көстүүнэн – автопробег ыытыллыыта буолла. Топпо сынньалаҥ пааркаттан Арассыыйа, Саха өрөспүүбүлүкэтин, Эбээн-Бытантай улууһун былаахтарын үөһэ күөрэччи иилиммит, киэргэтиллибит массыыналар субуруһа айаннаатылар.
Кыайыы болуоссатыгар ыытыллыбыт үөрүүлээх миитиҥҥэ нэһилиэк олохтоохторо, ыалдьыттара мустан, биир сомоҕо, түмсүүлээх буолуу бэлиэтин көрдөрдүлэр.
Өрөгөйдөөх тэрээһиҥҥэ Эбээн-Бытантай национальнай улууһун аҕа баһылыга Иннокентий Стручков уонна Түгэһиир нэһилиэгин баһылыга Сергей Аликов Арассыыйа былааҕын үөһээ күөрэттилэр, итиэннэ итии-истиҥ эҕэрдэлэрин тириэртилэр.
Бэлиэ күнү “Саһарҕа” фольклорнай түмсүү, “Тугусил” оҕо үҥкүүтүн народнай ансаамбылын оҕолоро ырыанан, үҥкүүнэн киэргэттилэр. Култуура үлэһиттэрэ «Сахам сирэ” ырыаны бэлэх ууннулар. Татьяна Старостина кыыһа Айселялыын толоруутугар “Сэрии оҕолоро” үҥкүү дохсун ытыс тыаһынан доҕуһуолланна.
Маны тэҥэ үөрүүлээх быһыыга-майгыга махтал суруктары туттарыы долгутуулаах түгэн буолла. Бу саас дойдубут килбэйэр киинигэр Москуба куоракка “Гарпан” ЭКК уонна уран тарбахтаах, айылҕаттан айдарыылаах, талааннаах дьоммут “Сокровище Севера” аан дойду таһымнаах бэстибээлгэ ситиһиилээхтик кыттан кэлбиттэрэ. Бэстибээл түмүгүнэн Сахабыт сирэ хас да сыллаах дьаныардаах кыттыы кэнниттэн “Бастыҥ экспозиция” аатын ылан кыайыы өрөгөйүн тутта.
Биһиги улууспут эмиэ туора турбакка, көхтөөхтүк кыттан, кыайыыгы кылааппытын учуоттаан, «Сокровище Севера” генеральнай дириэктэрэ Николай Габышев аатыттан Махтал суругу улууспут аҕа баһылыгар Иннокентий Стручкова, Түгэһиир нэһилиэгин баһылыгар Сергей Аликовка, “Гарпан» ЭКК дириэктэригэр Раиса Старостинаҕа үөрүүлээх быһыыга-майгыга туттардылар.
Сити курдук, чахчы даҕаны биир сомоҕо буолартан киэн туттуу, түмсүүлээх буолуу бу тэрээһиҥҥэ көһүннэ.
Сардаана Копырина
Хаартыскаҕа түһэрдэ Ньургун Боярский