Тэптэрии саламаат
5 ыстакаан аһыы сүөгэй,
75 г. бурдук
Сүөгэйгэ бурдугу кутан ытыйаллар. Итии хобордооххо куталлар. Тохтоло суох булкуйа туран, үрдүгэр арыы тахсыар диэри буһараллар. Түргэнник буһар буолан табыгастаах. Хобордоохтуун аҕалан уураллар.
Ымдаан
1,5 ыстакаан суорат,
3,5 ыстакаан уу,
1 кыра ньуоска сүөгэй,
муус.
Сайыҥҥы кэмҥэ сахалар ордук сөбүлээн иһэр утахтара. Оргутуллубут тымныы ууга суораты кутан, үрдүгэр биир дэхси күүгэн тахсыар диэри ытыйаллар. Тымныы сиргэ уураллар. Иһиэхтэрин иннинэ кыратык сүөгэй куталлар эбэтэр муус угаллар. Сороҕор арыы уулларан куталлар, оччоҕо арыылаах ымдаан диэн ааттыыллар.
Симии харта
Сылгы суон оһоҕоһо 350 г. Фарша: сылгы этэ 180 г., сүрэҕэ 210 г., быара 200 г., тыҥата 250 г., ис сыата 160 г., эриэппэ луук 75-80 г., туус, биэрэс.
Хартаны үчүгэйдик ыраастаан баран сууйаҕын, икки өттүттэн тиэрэ сылдьан. Сыалаах өттүн ис диэки гынан баран биир өттүн үрүҥ халыҥ сабынан бобо баайаҕын. Эти, сүрэҕи, быары, тыҥаны, ис сыатын луугу кытта эрийэр массыынанан эрийтэрэҕин, тууһу, биэрэһи эбэн булкуйаҕын, хартаҕа ыга симэн баран сабынан ыга тардан баайаҕын, тууһаммыт ууга орто уокка 50-60 мүнүүтэ буһараҕын. Буһан тахсыбыт хартаны бүлүүһэҕэ ууран баран сытыы быһаҕынан төгүрүк гына быһаталыыгын. Төгүрүктэри тэриэлкэлэргэ уурталаан, сылаас хортуоппуйу кытта эбэтэр бэйэтинэн да биэриэххин сөп. Симии харта сойдоҕуна да олус үчүгэй тымныы сокууска буолар.
Балык бөрүөк
Балыгы ириэрэбит, 1,5-2 ыстакаан ирииһи буһарабыт. Тиэстэбитин маннык оҥоробут. 2-3 ыстакаан бурдугу хайаан да сиидэлиибит. Паачыка аҥаара маргарины өрөһөлүү сиидэлэммит бурдукка ууран баран, быһаҕынан бытархай гына бысталыыбыт уонна биир ыстакаан кефири эбэтэр сэппэрээтэр убаҕас сүөгэйин кутабыт. Туустуурбутун умнубаппыт. Тиэстэбитин илиигэ сыстыбат буолуор диэри мэһийэбит уонна холодильникка эбэтэр сөрүүн сиргэ уурабыт. Ол кэмҥэ балыкпытын хатырыктыыбыт, уҥуоҕуттан араарабыт, төбөтүн быһабыт. Тиэстэбитин икки өлүүгэ арааран, пельмен тиэстэтинээҕэр арыый халыҥ гына тэнитэбит. Биирин лиискэ тэлгэтэбит. Буспут ириис улахан аҥарын, биир обургу луугу төгүрүк гына быһан уурабыт. Лавровай лииһи (4 устуука сөп буолуо) эбэбит, ол-бу туманы таммалатабыт (наһаа элбэҕи буолбатах). Онтон балыкпытын икки өттүттэн тууһаан уурабыт уонна ордубут ирииспитин үрдүгэр кутабыт. Тиэстэбит аҥаарынан саба ууран баран, кытыытын хам тутан холбуубут. Бөрүөкпүтүн бүтүннүүтүн сымыытынан (биир сөп буолуо) ньалҕарыччы сотобут. Тиэстэ кытыытыттан ордооччу, ол ордубутунан арааһынайдаан (сэбирдэх, сибэкки курдук моһуоннаан) бөрүөкпүт үрдүн киэргэтэбит. Ону эмиэ сымыытынан ньалҕарытабыт. Духуопкаҕа чаас кэриҥэ буһарабыт.
Кууруссаттан (кустан) шашлык
Куурусса эбэтэр кус түөһүн этин 3 см. кэтиттээх гына быһыҥ уонна 2 чаас маринадка туруоруҥ. Маринад: апельсин хаҕын бытархай гына теркалааҥ (цедра), апельсин аҥарын сүмэһинин ыгыҥ, 2 ост. ньуоска үүнээйи арыытын, 2 ост. ньуоска мүөт, туус, хара биэрэс, күөх үүнээйи.
Шампурга үөлэн баран кулуһун чоҕун үрдүгэр тутуҥ. Кэмиттэн кэмигэр эргитиҥ. Хаалбыт маринады үрдүгэр бырдаҥалатаргытын умнумаҥ.
Куурусса эбэтэр кус этин оннугар көтөрү бүтүннүү буһарыаххатын сөп. Ортотунан аҥардааҥ. Тууһунан, биэрэһинэн аҕааҥ, лимон согун тамматалатыҥ. Көтөрү икки шампурга үөлэн баран, кутаа чоҕун үрдүгэр эргитэ сылдьан буһарыҥ.
Балыктан шашлык
20-25 см. усталаах балыгы иһин ыраастааҥ, сууйуҥ, туустааҥ, биэрэстээҥ. 50-60 см. кэтиттээх уһун синньигэс маска үөлүҥ уонна кутаа тула балык төбөтүнэн таҥнары буоларын курдук батарыта анньыталааҥ. Балык биир өттө бустаҕына эргитэн биэриҥ.