2020 сылга талыллыбыт нэһилиэк баһылыктарын уонна дьокутааттарын боломуочуйаларын болдьохторо түмүктэнэринэн быйыл Саха сиригэр маассабай муниципальнай быыбардар буолуохтара. Ол иһигэр биһиэхэ, Эбээн-Бытантай улууһугар, балаҕан ыйын 14 күнүгэр икки нэһилиэк баһылыктарын уонна үс нэһилиэк дьокутааттарын талыахпыт.
Күһүҥҥү быыбардар тустарынан территориальнай быыбардыыр хамыыһыйа сэкэрэтээрэ Анна Слепцова сырдатта.
— Балаҕан ыйын 14 күнүгэр, биир кэлим куоластыыр күҥҥэ, биһиги улууспутугар муниципальнай таһымнаах быыбардар буолуохтара. Ол курдук, бу күн быыбардааччылар Аллараа-Бытантай уонна Үөһээ-Бытантай нэһилиэктэригэр баһылыктары уонна дьокутааттары талыахтара. Аллараа-Бытантай нэһилиэгэр — 11, Үөһээ-Бытантай нэһилиэгэр – 7 дьокутаат, онтон Түгэһиир нэһилиэгэр 5-тии мандаттаах үс уокурукка (Восточнай, Западнай, Центральнай), уопсайа 15 дьокутаат талыллыаҕа.
— Онтон Түгэһиир нэһилиэгин баһылыгын хаһан талыахпытый?
— Түгэһиир нэһилиэгин баһылыгын боломуочуйата 2026 сылга бүтэринэн, эһиил буолар күһүҥҥү быыбарга талыахпыт.
— Талыллыбыт нэһилиэк баһылыктара уонна дьокутааттар хас сыл үлэлииллэрий?
— Быыбар түмүгүнэн талыллыбыт баһылыктар уонна дьокутааттар 5 сыл үлэлииллэр.
— Хандьыдааттар төһө туруорунан эрэллэрий?
— Бэс ыйын 27 күнүттэн саҕалаан нэһилиэктэр учаастактааҕы быыбардыыр хамыыһыйалара хандьыдааттартан докумуон тутуутун саҕалаатылар. Бүгүҥҥү күҥҥэ биир даҕаны хандьыдаат туруоруна илик. Учаастактааҕы быыбардыыр хамыыһыйалар докумуону бэс ыйын 27 күнүттэн атырдьах ыйын 4 күнүгэр дылы туталлар.
— Куоластааһыҥҥа ким кыттыан сөбүй?
— Буолаары турар муниципальнай быыбарга 18 саастарыттан үөһээ Арассыыйа гражданнара олорор нэһилиэктэригэр, чуолаан докумуонунан пропискалаах сирдэригэр куоластааһыҥҥа кытталлар. Биһиги улууспутугар бу дьыл от ыйын 1 күнүн туругунан уопсайа 2082 быыбардааччы, ол иһигэр Түгэһиир нэһилиэгэр 1393, Аллараа-Бытантайга – 523, Үөһээ-Бытантайга 166 быыбардааччы баар.
Сардаана Копырина