Үгэс буолбут, таба куттаах эбээн норуота кыстыгы этэҥҥэ туораабытын бэлиэтээн, сандал сааһы уруйдуу-айхаллыы көрсөр Табаһыттар сүлүөттэрэ хоту сир олохтоохторун биир сүрүн күүтүүлээх, кэтэһиилээх бырааһынньыктара.
Бу күннэргэ буолаары турар сүлүөккэ ыраахтан-чугастан табаһыттар киирээри бэлэмнэнэллэр. Бырааһынньык устуоруйатын сэгэттэххэ, аан маҥнай Бытантайбыт сиригэр Табаһыттар сүлүөттэрэ 1936 сыллаахха тэриллэн ыытыллыбыт. Бу туһунан Р.И.Шадрин аатынан Саккырыыр орто оскуолатын 10 кылааһын үөрэнээччитэ Дайаана Готовцева (сал.И.Г.Колесова) чинчийэр үлэтин тиэмэтигэр сүрдээх сиһилии арыйан кэпсиир. Ол курдук, улуустааҕы архыыпка суруллубутунан 1935 сыллаахха 8 таба иитэр хаһаайыстыбаҕа 1235 төбө таба баара бэлиэтэммит, 1936 сылга номнуо 1423 таба диэн суруллубут. Ол эбэтэр, колхуостар, табаарыстыбалар, производственнай бөлөхтөр истэринэн таба иитэр хаһаайыстыбалар тэриллэннэр, бу салаа сайдыытыгар судаарыстыба өттүттэн болҕомто ууруллубутун түмүгэ — таба ахсаана элбээһинин бэлиэтээбиттэр. Маныаха табаһыттар уопут, санаа, билии-көрүү атастаһалларыгар араас хабааннаах тэрээһиннэри ыыталлара төһүү буолара.
1935 сыл балаҕан ыйын 4 күнүнээҕи телеграмма илииһигэр суруллубут Постановлениеҕа Табаһыттар сүлүөттэрин тэрийиигэ кэмитиэт анаммыт. Бу мунньаҕы көҕүлээччинэн С.В.Никитин буолар, тэрийсээччилэринэн О.Никитина, С.Лебедева, В.Никитин киирбиттэр. Ол курдук, Саккырыыр оройуонугар 1936 сыллаахха сэтинньи 1-2 күннэригэр аан маҥнайгы Табаһыттар сүлүөттэрэ ыытыллыбыт. Сүлүөт чэрчитинэн табаһыттар кыһалҕаларыгар туһуламмыт мунньахтар, ситиһиилэрин быыстапката, таба күрэхтэрэ уонна да атын бэрт сэргэх тэрээһиннэр ыытыллыбыттар.
Яна РОЖИНА
Хаартыскалар эрэдээксийэ архыыбыттан туһанылыннылар