Табаны иитии биһиги улууспут биир сүрүн, тутаах салаата буолар.
Быйыл биһиги Бытантайбыт сиригэр маҥнайгы табаһыттар сүлүөттэрэ ыытыллыбыта 90 сыл буолла. Оччолорго биһиэхэ 8 хаһаайыстыбаҕа 1423 таба баара архыып докумуоннарыгар бэлиэтэммит. Өбүгэ саҕаттан илдьэ сылдьар төрүт дьарыкпыт чахчы туруу үлэһит, күүстээх санаалаах, мындыр толкуйдаах дьоҥҥо эрэ кыаллар. Бүгүҥҥү күҥҥэ улууска 10 таба иитэр хаһаайыстыбаҕа 12000 тахса төбө баар. Улуус өттүттэн «Ленинское» МУСП-га уматык, бородуукта хааччыллыытыгар тус үбүлээһин көрүллэн өйөнөр. Өрөспүүбүлүкэ тыатын хаһаайыстыбатын министиэристэбин нөҥүө табаһыты өйүүр миэрэлэр эмиэ үгүстэр. Ол курдук, сыл аайы таба төбөтүгэр 8000 солк. тахса субвенция үбүлээһинэ көрүллэр. Ону тэҥэ, «Эдэр табаһыт» бырагыраама, тиэхиньикэ ылынарга, көһө сылдьар дьиэ туттарга уонна да атын куонкурус бэрээдэгэр олоҕурбут өйөбүллэр тиһигин быспакка ыытыллаллар. Сыралаах үлэлээх дьоммутугар – таба иитиитин салаатын бука бары үлэһиттэригэр барҕа махталбытын этэбит. Эһиги уустук үлэҕит сөптөөхтүк сыаналанара биһиги ытык иэспит. Биһиги табаһыттарбыт үйэттэн үйэҕэ тутан аҕалбыт табабытын харыстаан иитэн, сайдыы тэтимин кытта бииргэ хаамсан урукку көлүөнэттэн итэҕэһэ суохтук буһа-хата үлэлээн, улуус социальнай – экэнэмиичэскэй сайдыытыгар сүҥкэн кылааккытын киллэрэргитин сыаналыыбын, инникитин таба салаатын өссө үрдүк кэрдиискэ таһаарыаххыт диэн бигэтик эрэнэбин. Дьаныардаах үлэ өссө тэтимирэн, уйгулаах олоххо сирдээн, эһиги көмөҕүтүнэн улуус кэскилэ өссө сырдык уонна байылыат буолуоҕа. Көхтөөх уонна таһаарыылаах үлэ саҥа геройдара, аатырбыт табаһыттар уһаарыллан тахсан истиннэр.
Күндү таба иитиитин салаатын бары үлэһиттэрэ, ытык – мааны ветераннара! Эһиэхэ чэгиэн-чэбдик доруобуйаны, таһаарыылаах үлэни, өлгөм төрүөҕү, тус олоххутугар дьолу-соргуну баҕарабын! Или – эйэни!
Улуус Аҕа баһылыга И.Н.Стручков