2024 сыл Эбээн Бытантай национальнай улууһугар Тыа хаһаайыстыбатын сылынан биллэриллибитэ

Таба иитиитэ үгүс сыраны, сылбаны ирдиир үлэ. Ол эрэн, удьуор табаһыттарбыт, төрүт дьарыгы бэриниилээхтик илдьэ сылдьар дьоммут баар буоланнар — таба баар, дьарык утумнанар.

Төрүт дьарык төгүрүк сыл тиһиктээх, ситимнээх үлэни эрэйэр. Ол курдук, таба ааҕыыта, тугут төрүөҕэ, маны тэҥэ хааннааһын, араас ыарыылартан быһыы туруоруу. Саас кэлэн ирдэбил быһыытынан табаһыттар, бэтэринээрдэр ахсаан, хаанныыр үлэ үгэнигэр сылдьаллар.

Бүгүҥҥү күҥҥэ бэтэринэриийэ үлэһиттэрэ икки диэки арахсан,  2 общинаҕа үлэлэрин түмүктээн эрэллэр.

Улууска “Ленинскэй” МУТ хаһаайыстыбатыгар 6 ыстаада баар, маны таһынан таба иитиитинэн 2 ородобуой община “Айылыыр”, “Кочевник” икки ыстаадалаахтар, биир община уонна КФХ-лар, ЛПХ-лар бааллар. Чааһынай таба “Арктика” СХПК тула түмүллэн турар, улуус үрдүнэн уопсайа 12800 таба баар.” – Лена Бочкарева, улууска  т/х  салалтатын салайааччыта.

“Ленинскэй” МУТ хаһаайыстыбатыгар билигин хааннааһын буола илик, кэлэр нэдиэлэттэн саҕаланар. Ол, бастатан туран, бэтэринээрдэрбит общиналартан бүтэн хаһан кэлэллэриттэн тутулуктаах. Маныаха эбии быйыл чиптээһин үлэтин ыытыахпыт дииллэр, ол эрэн ону халлаан туругуттан көрөн оҥороллоро буолуо, ымпыгын-чымпыгын өссө үчүгэйдик үөрэтэн быһаарыахпыт”- диэн Иннокентий Максимов, “Ленинскэй” МУТ салайааччыта сырдатта .

“Турукаан” ородобуой общинаны бүтэрэн ааспыттара, билигин “Кочевник” иккис нүөмэрдээх ыстаадатыгар уонна Старостина, Бочкарев КФХ -лар ыстаадаларыгар баран тураллар. Быйылгы үлэлэригэр хааннааһын уонна «Сибиркая язва” утары быһыыны биэрэллэр, бу босхо буолар. Хааннааһын чинчийиитэ босхо буолар, клиничэскэй көрүүтэ, ол эбэтэр уопсай туруктарын көрүү төлөбүрдээх өҥө. Ыстаадалары барыларын кэрийэр сыалтан, кулун тутар ыйы толору үлэлиибит. Бу үлэлэр толору бүппүттэрин кэннэ, биирдэ уопсай түмүк оҥорооһун үлэтэ барар биһиэхэ.” – диэн Бэтэринээриийэ салалтатын салайааччыта, Саргылана Николаева кэпсээтэ.

Марианна Слепцова