Бар дьоҥҥо үөрүүнү саҕыы, кэрэ эйгэтигэр киллэрии туохтааҕар да күндү. Бу маннык сырдык аналларынан «Гарпан” этнокултуурунай киин эргиччи талааннаах үлэһиттэрэ Кустуур нэһилиэгин кэнниттэн, салгыы Дьарҕаалаахха айаннаан, култуурунай-методическай десант ыыттылар.
« Олунньу 12 күнүгэр Дьарҕаалаах нэһилиэгэр «Гарпан» этнокултуурунай киин кэллэктиибэ култуурунай-методическай десант чэрчитинэн кулууп үлэһиттэригэр аналлаах семинар, төгүрүк остуол, уопут атастаһыыта ыытта.
Салгыы нэһилиэнньэҕэ, оҕолорго анаан араас хайысхалаах маастар-кылаастар буоллулар. Ол курдук, Надежда Дьячковская араас үҥкүүлэри үөрэттэ, этно-фитнес ыытта. Валерианна Максимова хомуска үөрэттэ, араас матыыптары тыаһатан көрдөрдө. Владислав Колесов ырыаҕа куоластарынан арааран, муусуканы табан ыллыырга үөрэттэ, чубуку муоһуттан харысхалы хайдах оҥорору көрдөрдө, үөрэттэ. Мария Аммосова таба муоһуттан, туйахтарыттан, уҥуохтарыттан тыас-уус таһаарар эбээннии инструменнары оҥорорго, итиэннэ оҕуруонан симэхтэри оҥорорго үөрэттэ. Мария Ивановна бэйэтэ оҥорбут оҥоһуктарын тус быыстапката буолла. Түгэһиир айар талааннаахтарын уус-уран кэнсиэригэр элбэх көрөөччү сырытта.
Улахан махталбытын тиэрдэбит техниканнан көмөлөспүт олох-дьаһах коммунальнай хаһаайыстыба салайааччытыгар Максим Петрович Гороховка, Дьарҕаалаах орто оскуолатын директорыгар Сергей Михайлович Ивановка, сымнаҕас,сыыдам сырыылаах суоппардарга Семен Петрович Гороховка, Николай Иванович Ивановка, горючайынан көмөлөспүт Түгэһиир нэһилиэгин баһылыгар Сергей Сергеевич Аликовка, Үөһээ-Бытантай нэһилиэгин баһылыгар Лев Вячеславович Гороховка,» — диэн “Гарпан» этнокултуурунай киин дириэктэрэ Раиса Старостина сырдатта.
