Тыа сиригэр, ордук хотугу эргимтэҕэ хаадыр боппуруоһа сытыытык турар. Дойдубут бэрэсидьиэнэ Владимир Путин сорудаҕынан физическай култуура уонна успуорт эйгэтигэр исписэлиистэри аҕыйах нэһилиэнньэлээх пууннарга тардыыга туһулаан “Земскэй тириэньэр” федеральнай бырагыраама үлэлиир. Бу бырагырааманан быйыл Эбээн-Бытантай улууһун В.Н. Стручков аатынан оҕо спортивнай оскуолатыгар мас тардыһыы уонна хотугу многоборье көрүҥэр эдэр тириэньэр Владимир Федоров үлэлии кэллэ.
— Владимир Алексеевич, баһаалыста бэйэҕин билиһиннэр. Хантан сыдьааннааххыный? Ханна үөрэнэн туох идэтин баһылаабыккыный?
— Мин төрдүм-ууһум Олоҥхо дойдута — Сунтаар улууһа. Төрөөбүт дойдубар 1-6 кылааска дылы үөрэммитим. 7-с кылааска Дьокуускайдааҕы кадетскай оскуола-интернакка үөрэнэ киирбитим, 2022 сыллаахха кадетскайбын бүтэрэн олох киэҥ аартыгар үктэммитим. Учуутал буолар баҕа санааттан ити сыл С.Ф. Гоголев аатынан Дьокуускайдааҕы педагогическай кэллиэскэ физическай култуура диэн салааҕа туттарсан киирэн устудьуон олоҕун билбитим. 3 сыл “элэс” гынан ааһа охсон 2025 сыллаахха үөрэхпин ситиһиилээхтик үөрэнэн бүтэрэн, салгыы М.К. Аммосов аатынан ХИФУ физическай култуура уонна успуорт институтугар үрдүк үөрэххэ туттарсан киирбитим. Биир сыл үөрэнэн баран, үлэлиир баҕаттан кэтэхтэн көстүм.
— «Земскэй тириэньэр” бырагыраамаҕа кыттыыҥ туһунан кэпсээ.
— Быйыл “Земскэй тириэньэр” диэн саҥа бырагыраамаҕа куонкуруска кыттан, араас улуустартан, атын куораттартан 34 киһиттэн 18 квота иһигэр киирэн хоту дойдуну көрөөрү Эбээн-Бытантай улууһун таламмын 5 сыл үлэлии кэллим.
— Успуордунан хаһааҥҥыттан дьарыктанаҕын? Туох ситиһиилэрдээххиний?
— Бэйэм успуордунан оҕо эрдэхпиттэн дьарыктанабын. Оскуолаҕа үөрэнэ сылдьан тустуунан, онтон үөрэххэ киирэн баран ММА-нан дьарыктаммытым. Уһук Илиҥҥи уокурукка былырыын 2025 сыллаахха ММА чөмпүйүөннээбитим, 2024 сыллаахха балаҕан ыйыгар Арассыыйа Кубогар «Спортивнай Миксфайт” бастаабытым. 2024 сыллаахха Камчаткаҕа эрэгийиэннэр икки ардыларынааҕы Губернатор Кубогар СБЕ ММА (булкаас охсуһуу көрүҥэ) кыттан, бастаабытым. Уонна өрөспүүбүлүкэ иһинэн ММА эмиэ бастыы сылдьыбытым.
— Саҥа сиргэ кэлэн баран үлэ-хамнас хайдах саҕаланна?
— Саккырыырга балаҕан ыйын 3 күнүгэр кэлбитим. Олохпор хоту дойду сиригэр бастакы үктэниим, сүрэхтэниим буолар. Кэлээт В.Н. Стручков аатынан спортивнай оскуолаҕа тута үлэлии тахсыбытым, ону тэҥэ Р.И. Шадрин аатынан Саккырыыр орто оскуолатыгар 10 чаастаахпын. Сотору кэминэн спортивнай оскуолаҕа дьарыктар саҕаланыахтара. Мас тардыһыытыгар уонна хотугу многоборьеҕа 10-н үөһээ саастаах оҕолору дьарыкка сурутарга ыҥырабын.
— Инники былааннарыҥ?
— Инники былааным диэн оҕолору утумнаахтык дьарыктаан ситиһиилээх түмүк көрдөрүү, ону тэҥэ эт-хаан өттүнэн эрчийэн чөл, чэбдик олохтоох ыччаты таһаарыы буолар. Айан өттө ыарахан соҕус буолуо да буоллар, кыах баарынан араас күрэхтэһиилэргэ кытыннарар баҕа санаалаахпын.
— Кэпсэтииҥ иһин махтанабыт. Үлэҕэр ситиһиилэри баҕарабыт.
Сардаана Копырина