Бүгүн, муус устар 1 күнүгэр биһиги улууспутугар кутурҕан күн… Биир дойдулаахпыт, анал байыаннай дьайыы кыттыылааҕа, хорсун байыас, хотугу хоһуун, тапталлаах кэргэн, амарах аҕа Николай Николаевич Баишевы тиһэх суолугар атаардыбыт.
Николай Николаевич бу дьыл кулун тутар 13 күнүгэр анал байыаннай дьайыы сиригэр, уоттаах сэрии толоонугар бойобуой сорудаҕы толоро сылдьан хорсун быһыыга олоҕун толук уурда.
Сарсыҥҥы сардаҥалаах олохпут туһугар дьоруойдуу сэриилэспит уолбут үтүө аата хаһан да умнуллуо суоҕа.
Баишев Николай Николаевич
(05.04.1990 – 13.03.2025)
Анал байыаннай дьайыы кыттыылааҕа Баишев Николай Николаевич бу дьыл кулун тутар 13 күнүгэр бойобуой сорудаҕы толоро сылдьан орто дойду олоҕуттан барда.
Николай Николаевич 1990 сыл муус устар 5 күнүгэр Эбээн – Бытантай национальнай улууһугар Саккырыыр нэһилиэгэр күн сирин көрбүтэ. Ийэтэ Мохчогорова Христина Николаевна, аҕата Баишев Николай Петрович бастакы оҕолоро этэ.
2008 сыллаахха Р.И.Шадрина аатынан Саккырыыр орто оскуолатын бүтэрбитэ. Оскуолаҕа үөрэнэр сылларыгар нуучча тылын, историяны олус таптыыра, учууталларыгар убаастабыллаахтык сыһыаннаһара, оскуола араас тэрээһиннэригэр өрүү кыттара. Хотугу сулус теле- радио юнкора буолан 5 кылааска үөрэнэ сылдьан Гоголева Татьяна Афанасьевна салайааччылаах Китай куоракка баран кэлбитэ.
Төрөппүттэрэ араас үлэҕэ эриллэн улааппыт уонна олохторугар үлэни өрө туппут буоланнар, оҕолорун, ол иһигэр Коляны эмиэ тыа сирин үлэтин сатыыр, таптыыр буолалларын курдук ииппиттэрэ. Коля оскуола сааһыттан ынаҕы сатаан ыыр, көрөр-харайар, сүөһүгэ, сылгыга сыстаҕас буола улааппыта. Коля кыратыттан дьиэ үлэтигэр сыстаҕас: дьиэ ис – тас үлэтин барытын толороро. Аҕалара эрдэ олохтон туораан, Коля ийэтин тутаах көмөлөһөөччүтэ буолбута. Ийэтин убайын Мохчогоороп Уйбааны кыратыттан эһэм диэн батыһа сылдьан массыына, тыраахтыр өрөмүөннүүргэ үөрэммитэ, үрдүкү кылааска үөрэнэ сылдьан матаһыыкылы, легковой, грузовой массыыналары, тыраахтары сатаан ыытар, алдьаннахтарына өрөмүөннүүр буолбута. Эһэтин кытта хас сайын, күһүн аайы оттук мастарын, муустарын, отторун бэлэмнэһэрэ.
2010 сылга Коля тапталын, олоҕун аргыһын көрсөн, Мотя Сотрудниковалыын ыал буолбуттара. Элбэх оҕолоох ыал аҕа баһылыга, тапталлаах кэргэн буолбута.
Дьарҕаалаахха элбэх сүөһүнү көрөн, оҕо-уруу төрөтөн ньир – бааччы орто ыал сиэринэн олорбуттара. Дьарҕаалаахха олорон нэһилиэк араас тэрээһинигэр көхтөөхтүк кыттара, үлэни кыайа тутара. Ол курдук, олус үчүгэйдик үлэлии-хамсыы сылдьан, ыал тапталлаах аҕата 2024 сыл ахсынньы ыйга баҕа өттүнэн Анал байыаннай дьайыы буола турар сиригэр барбыта.
Коля кыра эрдэҕиттэн дьиҥ сахалыы тыыннаах, олус аймаҕымсах, доҕотторугар аһара бэриниилээх, эппит тылыгар мэлдьи турар, эрэннэрбитин толорор дьиҥнээх табаарыс, доҕор, атас этэ. Кини дьоҥҥо үтүө санаата, аймахтарыгар, кыамматтарга, кырдьаҕастарга көмөлөспүтэ үйэлэргэ үтүө тылынан ахтылла туруоҕа. Оҥорбут хорсун быһыыта үйэттэн үйэҕэ кэнчээри ыччакка бэриллэ туруоҕа.
Анал байыаннай дьайыыга эйэлээх олох иһин сырдык тыынын толук уурбут биир дойдулаахпыт Баишев Николай Николаевич чугас дьонугар, дьиэ кэргэнигэр, оҕолоругар, аймах-билэ дьонугар, доҕотторугар дириҥ кутурҕаммытын тиэрдэбит. Кылгас, ол гынан баран саха киһитин быһыытынан сэмэй олоҕун, хорсун быһыытын биһиги улуус дьоно ытыктыыбыт, убаастыыбыт, суохтуубут.