Сайыҥҥы сынньалаҥ лааҕыр оҕо бириэмэтин туһалаахтык атаарарын таһынан айар дьоҕура сайдар, үөлээннээхтэрин кытары биир тылы була үөрэнэр, доруобуйата да бөҕөргүүр.
Улуус киинигэр “Гарпан” этнокултуурунай киин иһинэн үҥкүү, ырыа, хомус хайысхалаах сайыҥҥы куруһуоктарга барыта 48 оҕо сылдьар. Бэҕэһээ сайыҥҥы лааҕыр үөрүүлээх арыллыыта буолан ааста. Бу туһунан «Гарпан» этнокултуурунай киин дириэктэрэ Раиса Старостина кэпсээтэ.
- Сайыҥҥы лааҕырдарбыт ыам ыйын 26 күнүттэн саҕалаан тэтимнээхтик үлэлииллэр. Оҕолор күн аайы үөрэ – көтө кэлэллэр. “Нүргэнэк” үҥкүү куруһуогун хореограф Надежда Дьячковская, “Тургун” ырыаҕа куруһуогу олохтоох автор, мелодист Владислав Колесов, “Лыҥкынас” хомус куруһуогун баай уопуттаалаах култуура бэтэрээнэ Валерианна Максимова салайаллар. Ол курдук, лааҕырбыт үөрүүлээх арыллыыларын тэрээһинэ олус сэргэхтик буолан ааста, оҕолору нэһилиэк баһылыга Сергей Аликов, култуура салалтатын салайааччыта Степан Слепцов эҕэрдэлээтилэр. Тэрээһимиит этэрээттэр сэлэлии хаамыыларыттан саҕаланна. Лааҕыр былааҕын Альфред Оконешников тутта,хамандьыыр Сандра Петрова этэрээт блэмин туһунан иһитиннэрдэ. Оҕолорбу сайын туһунан ыллаан, хомуска сахалыы матыыптары тардан, аныгылыы тэтимнээх үҥкүүнэн эҕэрдэлээтилэр. Этнокултуурунай киин үлэһиттэрэ М.И.Аммосова, В.И.Максимова, В.М.Поисеев, Щ.Н.Рябчиков нори, дартс, мини-баскетбол көрүҥнэргэ күрэхтэһиилэри, көрдөөх оонньуулары тэрийэн ыыттылар. Кыайыылаахтар кырааматаларынан,мэтээллэринэн уонна бириистэринэн биһирэннилэр.
Сити курдук, оҕолор култуура арас хайысхаларыгар дьарыктарын таһынан бириэмэлэрин олус туһалаахтык атаараллар. Үҥкүү куруһуогун оҕолоро сылын аайы ыытыллар Табаһыттар сүлүөттэрин сирин бөҕүн-сыыһын хомуйан ырааһырдыы үлэтин ыыттылар. Бу хайҕаллаах бачыым үтүө холобур. Төрөөбүт сиргин харыстаа, таптаа диэн өйдөбүлү хас биирдии киһи кэнчээри эрдэхтэн иҥэринэн, дойдубут сайдыытыгар сэмэй кылаатын киллэрэр кыахтаах.
Ксения Горохова