Дмитрий Сыроватский, Түгэһиир нэһилиэгин баһылыгын солбуйааччыта: Дьон бензин хаһааннын диэн Баатаҕайдааҕы ниэп баасатыгар сайаапка ыытан, кыһыҥҥы суол баар кэмигэр Түгэһиир нэһилиэгэр уопсайа 29274 л. бензин тиэллэн кэллэ. Былырыын 1 л. бензин 95 солк. этэ, быйыл – 98 солк. суруттарбыт дьон бэйэтэ иһиттээх баран, биллэриллибит кэмҥэ уматыгын куттан ылар.
Аны сотору 41,76 туонна тааралаах бензин кэлиэҕэ, сыаната 94 солк. буолуоҕа. Былырыын 91 солк. этэ. Маны таһынан 9,216 туонна сэлээркэ кэлиэҕэ, 1 л. – 108 солк. 
Константин Старостин, Аллараа-Бытантай нэһилиэгин баһылыга: Быйылгы сылга тааралаах бензиҥҥа улахан кээмэйи — 6 контейнерга сайаапка биэрбиппитин күн бүгүн 4 контейнерга, ол эбэтэр 1152 устуука 40-наах канистраҕа дуогабар түһэристибит. Онтон сэлээркэ быйыл кэлбэт. Тоҕо диэтэр былырыыҥҥы сылтан 70-тан тахса канистра (3 туонна) кэриҥэ ордон турар. Тааралаах уматыгы тиэйии быйыл эрдэ саҕаланна, онон күүтэбит.
Быйыл элбэх мунньахтар, кэпсэтиилэр түмүктэринэн СӨ нэһилиэнньэ олоҕун-дьаһаҕын куттал суох буолуутун хааччыйар судаарыстыбаннай кэмитиэт (госкомобеспечение) тиэйэн аҕалан кутуллар бензины (налив) сакаастыырга көҥүл биэрбиттэрин үөрэ-көтө ылсан үлэлээн, 11 туоннаттан тахса кубтаах бензовоз кэлэн барбыта. Өссө даҕаны бензовоз кэлиитигэр үлэлэһэ сылдьабыт.
Аида Стручкова, Үөһээ-Бытантай нэһилиэгин дьаһалтатын исписэлииһэ: Биһиги нэһилиэкпитигэр тааралаах уматык, чуолаан 40320 л. бензин, 5760 л. сэлээркэ кэлиэхтээх, иччитэх канистралары хомуйан бэлэмнээн кэтэһэ олоробут.
Сардаана Копырина