Ханнык баҕарар киһиэхэ олоҕор ыарахан балаһыанньа үөскүөн сөп. Соһуччу түгэн тирээн кэллэҕинэ, хантан хайдах көмө ылыахха сөбүй?
Эбээн Бытантай национальнай улууһун дьаһалтатын иһинэн матырыйаалынай көмөнү көрүүгэ анал хамыыһыйа үлэлиир, бэрэссэдээтэл Аҕа баһылык Иннокентий Стручков. Хамыыһыйа барыта 12 киһи састааптаах, манна нэһилиэктэр баһылыктара уонна тустаах тэрилтэлэр салайааччылара киирэллэр.
Уустук балаһыанньаҕа түбэспит элбэх оҕолоох дьиэ кэргэттэри, дохуоттара кыра уонна соҕотох олорор гражданнарга уонна да атын көмөҕө наадыйар араҥаҕа биир кэмнээх өйөбүл 2023 сыл сэтинньи 20 күнүнээҕи 96№-дээх Дьаһалга олоҕуран үлэлиир, болдьоҕо 5 сыл, сокуоннар уларыйыыларынан эбии уларытыы киирэн иһэр. Бу Дьаһал иитинэн ааспыт сылга уустук балаһыанньаҕа түбэспит дьоҥҥо барыта 1 мөл. 300 солкуобайга биир кэмнээх өйөбүл оҥоһуллубут. Быйылгы сылга манна улуус бүддьүөтүттэн 1 мөл.солкуобай көрүллүбүт. Уустук балаһыанньаҕа түбэспит киһи сайабылыанньатын анал хамыыһыйа дьаһалга киирбит түһүмэхтэринэн, ол эбэтэр дохуотун, түгэн биричиинэтин ырытан көрөллөр, куоластааһын быһыытынан өйөбүл кээмэйин, сөптөөҕүн быһаараллар. Маҥнайгы уочаракка анал дьайыы кыттыылаахтарын дьиэ кэргэттэрэ киирэллэр. Өйөбүл кээмэйэ киһи киирбит түгэниттэн көрөн 50000 солк. диэри буолуон сөп. Маны таһынан, ордук ыксаллаах, суһал түгэҥҥэ өйөбүл икки сиртэн, ол эбэтэр нэһилиэк уонна улуус дьаһалталарыттан оҥоһуллуон сөп.
Сити курдук, уустук балаһыанньа тирээн кэллэҕинэ эн соҕотох буолбатаххын, барар сирим баҕана үүтэ диэн баран санааҕын түһэримэ. Үөскээбит кыһалҕаны быһаарарга, уустук балаһыанньаҕа түбэспит дьоҥҥо өйөбүл оҥорорго оройуон дьаһалтатын салалтата бары боппуруостары кэмигэр быһаарар.
Яна Рожина