Дьарҕаалаах нэһилиэгэр сылын аайы үгэс буолан ыытыллар, олохтоохтор саамай күүтэр тэрээһиннэрэ — «Күһүҥҥү дьаарбаҥка» Дьарҕаалаахтааҕы «Тугутчаан» оҕо уһуйаанын үлэһиттэрин уонна төрөппүттэр тэрийиилэринэн буолла.
Бу күн уһуйаан-саад тиэргэнэ араас ас эгэлгэтинэн: кус, балык, оҕуруот аһын, отон араас көрүҥүнэн туолла. Уһуйаан иитиллээччилэрэ бэйэлэрэ үүннэрбит оҕуруот астарын, төрөппүттэрин кытары астаабыт бүлүүдэлэрин нэһилиэнньэҕэ атыылаатылар. Маны сэргэ тэрээһиҥҥэ олохтоох асчыт кыргыттарбыт олус көхтөөхтүк кыттыбыттара бар дьон биһирэбилин ылла.
Атыы-тутуу таһынан, тэрээһин алтыһыы, үөрүү-көтүү биир улахан түһүлгэтэ буолла.
Нина Софронова – Туйгууна, Дьарҕаалаах бөһүөлэгэ