Тоҥ буору тобулан тахсыбыт ньургуһун сибэкки кэриэтэ Кустуур нэһилиэгин “Мэрлэнкэ” ансаамбыл эдэр ийэлэрэ сырдыктар, кэрэлэр, хорсуннар! Киин сиртэн төһө да кытыы, уһук хоту нэһилиэккэ олордоллор, аҥардас дьулуурдарынан, кэрэҕэ-сырдыкка, кыайыыга-хотууга тардыһыыларынан, өрөспүүбүлүкэбитигэр, дойдубутугар, норуоттар икки ардыларынааҕы таһымнаах куонкурустарга харса суох кыттан, талба талааннарын киэҥ эйгэҕэ таһаараллар.
«Ньургуһуннар” (Мэрлэнкэ) ансаамбыл 2007 сыллаахха «Маранга” этнокултуурунай киин иһинэн тэриллэн үлэлээбитэ. Эдэр ийэлэри түмэр, култуура эйгэтигэр сыһыарар бөлөҕү улуус, нэһилиэк олоҕор көхтөөх кыттыыны ылар уопсастыбынньык, элбэх оҕолоох ийэ, «Маранга” ЭКК уус-уран салайааччыта Анжела Игоревна Горохова 19 сыл устата сатабыллаахтык салайан кэллэ. Иллээх-эйэлээх кэлэктиипкэ култуура, оскуола, оҕо уһуйаана, балыыһа уо.д.а. олох араас эйгэтигэр үлэлиир ыал ийэлэрэ, 10 кэрэ куо сылдьаллар.
“Мэрлэнкэ” бөлөх көрдөөх-нардаах сценкалардаах, пародиялардаах, ырыа-үҥкүү аргыстаах дьоро киэһэлэригэр сылдьыбыт эрэ сэргиир, көрбүт эрэ кэрэхсиир, сүргэтэ көтөҕүллэр, күлэн-үөрэн, эппиккэ диэри, олоҕо уһуур.
Кинилэр кыракый кыым уотун кэриэтэ саҕыллан, бу сыллар устата үүнэн-сайдан, араас таһымнаах куонкурустарга кыттан, үрдүк кыайыылары ситиһэн, 2024 сыллаахха Саха Өрөспүүбүлүкэтин народнай фольклорнай ансаамбыла статуһу ылбыттара. Элбэхтэн аҕыйаҕы сырдаттахха, 2023 сыллаахха Санкт-Петербург куоракка ыытыллыбыт «Добровидение” норуот ырыаларын бэстибээлигэр улууспут, өрөспүүбүлүкэбит култууратын сырдатар чиэһи сүкпүттэрэ. Быйыл, 2026 сыллаахха Красноярскайга ыытыллыбыт “Сокровище Севера” норуоттар икки ардыларынааҕы быыстапка-дьаарбаҥкаҕа “Мэрлэнкэ” ансаамбыл солистката Ольга Попова 1 миэстэни ылбыта.
Салгыы Беларусь Өрөспүүбүлүкэтигэр Минск киин куоратыгар ыытыллыбыт “Легенда» куонкурус-бэстибээлгэ ансаамбыл кыттыылаахтара сылдьаннар, “Фольклор уонна этнография” номинацияҕа 3 истиэпэннээх Лауреат үрдүк аатын ылбыттара! 
Бу араас тэрээһиннэргэ кыттыыны ыларга, биллэн туран, уһук хоту бүгэн сытар нэһилиэктэн дойдубут килбэйэр киин куораттарыгар айанныыр сылаалааҕын ааһан олус ороскуоттааҕа биллэр суол. Ону ол диэбэккэ, ыарахаттартан чаҕыйбакка, тоҥ буору тобулбут ньургуһун кэриэтэ кыргыттар, киэҥ аартыгы арыйан, айар-тутар суолларын эрэллээхтик тэлэллэр. Түгэнинэн туһанан, Кустуур нэһилиэгин «Мэрлэнкэ” ансаамбылын кэрэ куоларын кэлэн иһэр Ийэлэр күннэринэн итиитик-истиҥник эҕэрдэлиибит! Инникитин даҕаны бу курдук айымньылаахтык үлэлээн, кэрэни, сырдыгы, үйэлээҕи түстүү сылдьыҥ, ситиһии аргыстаах, доруобай, чэгиэн буолуҥ!
Сардаана Копырина