Ааспыт нэдиэлэ бүтүүтэ икки күн устата Саккырыыр орто оскуолата тигинээн олордо. Уйулҕа доруобуйатын ыйынньыгын сүнньүнэн үөрэнээччилэр, төрөппүттэр уонна учууталлар икки ардыларыгар волейбол күрэҕэ спорт түһүлгэтигэр барыбытын түмтэ.
Тэрээһини “Осикат” оҕо хамсааһына, оскуола психолога, социальнай педагог, логопед, советник уонна физкультура учууталлара тэрийэн ыыттылар. Бастыҥ, солбуллубат комментаторбыт – английскай тыл учуутала Андрей Суханов.
Күрэхтэһиигэ уопсайа 8 хамаанда – «Редисочки», “Крепость”, “Экстрим”, “Датэко”, “Зенит”, “Хотойдор”, “Дабдукан” учууталлар, “Супер родители” төрөппүттэр хамаандалара күөн көрүстүлэр. Мин эмиэ хамаанда иһигэр киирэн оонньооччу быһыытынан кыттыыны ылбытым. 
Төрөппүттэрбит олус маладьыастар, бастыҥ оонньуулары көрдөрдүлэр! Оскуолабыт дириэктэрэ Николай Васильевич бу бэйэлээх оҕолору, учууталлары, төрөппүттэри барыбытын түмэр күрэхтэһииттэн туора турбакка, кылаабынай судьуйалаан бастыҥ холобур буолла.
Икки күннээх тыҥааһыннаах күрэхтэһии түмүгүнэн 1 миэстэни «Датэко” хамаанда ситиһэн кыайыы өрөгөйүн биллэ. 2 миэстэни «Супер родители”, 3 миэстэни “Редисочки” хамаандалар ыланнар үөрдүлэр-көттүлэр. Маны таһынан бастыҥ оонньооччуларга араас номинациялар ананан грамотанан наҕараадаланнылар.
Волейбол күрэҕэ бары оҕолорго чаҕылхай өйдөбүллэри хаалларда уонна улахан уопут буолла!
Милана Слепцова, эдэр кэрр., Саккырыыр орто оскуолатын 8 кылааһын үөрэнээччитэ