Сүрүн салаабыт – таба иитиитин туруу үлэһит дьоно,чулуу табаһыттар сүлүөттэрэ икки күн устата киэҥ далааһыннаахтык ыытылынна.
Үтүө үгэскэ олоҕуран «Нөлтэнкэ» бырааһынньык өбүгэ ситимин салҕаан, эбээн омук таҥаһын кэтэн сэлэлии хаамыыттан саҕаланна. Үөрүүлээх хаамыыга адаархай муостаах табаларын сиэппит Хотугу Хоһууннарбыт, сиэдэрэй көстүүлээх эбээннии таҥас эгэлгэтин тэҥэ, Дьааҥы улууһуттан ыалдьыттарбыт сахалыы оһуор-мандар мааныта таҥастарын кэтэн хаамсыбыттара кэрэ көстүү буолла. Сэлэлии хаамыыны улуус баһылыга Иннокентий Стручков уонна сүлүөт күрэхтэрин сүрүн суудьуйата Иннокентий Аммосов салайдылар. Ыҥырыылаах ыалдьыттар Арассыыйа Геройа, СӨ Ыччат дьыалатыгар министиэристибэ иһинэн «Патриот” тэрилтэ салайааччытын солбуйааччыта Николай Евдокимов, сүрүннүүр исписэлиис Никита Аянитов, СӨ дьахталларын хамсааһынын сойууһун бэрэссэдээтэлэ Анжелика Андреева, Чурапчытааҕы спорт институтун ректора, педагогическай билим кандидата Иннокентий Готовцев, РСФСР спордун маастара Иван Чиркоев, Нерюнгри куорат «Арктика» экспериментальнай оскуола-интернат иитии үлэтигэр дириэктэри солбуйааччы Мария Егорова, Дьааҥы улууһуттан дьокутааттар оройуоннааҕы Сэбиэттэрин бэрэссэдээтэлэ Екатерина Ноговицына уонна тэрилтэлэр кэлэктииптэрэ, нэһилиэктэр дэлэгээссийэлэрэ кыттыыны ыллылар.
Өбүгэ сиэринэн түһүлгэҕэ киирии «Дөлбүргэ» -ыраастаныы туомунан саҕаланна. Чуумпуруу мүнүүтэ кэннэ, сүлүөт саҕаламмытын кэрэһэлиир Кыайыы, дойду, өрөспүүбүлүкэ уонна улуус былахтарын Арассыыйа Геройа Николай Евдокимов, анал дьайыы кыттыылааҕа, Хотугу норуоттар Оонньууларын Кыайыылааҕа уонна призера Владимир Стручков, удьуор табаһыт, Хотугу норуоттар Оонньууларын Кыайыылааҕа, өрөспүүбүлүкэтээҕи сүлүөт чемпиона Павел Константинов, Хотугу норуоттар Оонньууларын хас да төгүллээх Кыайыылааҕа уонна араас таһымнаах Табаһыттар сүлүөттэрин чемпиона Вячеслав Колесов, Хотугу норуоттар Оонньууларын хас да төгүллээх Кыайыылааҕа уонна араас таһымнаах Табаһыттар сүлүөттэрин чемпиона, чулуу табаһыт уолбут Марат Слепцов, өрөспүүбүлүкэтээҕи “Көс ыал” күрэх кыттыылааҕа, араас таһымнаах сүлүөттэр Кыйаыылааҕа Алексей Сыроватскай дьоһун быһыыга өрө күөрэттилэр.
Яна Рожина