Олох уонна өлүү-сүтүү быстыспат ситимнээх айылҕа оҥоһуута. Кэккэ сылларга суут сокуон ирдэбилинэн өлүгү харайыы булгуччу экспертиза эрэ кэннэ көҥүллэнэр. Бу ордук биллибэт түгэҥҥэ анараа олоххо аттаммыт киһи өлүгэр күүскэ ирдэнэр. Бу ирдэбил түмүгэр өлүк хас да хонук, сороҕор хастыы эмэ нэдиэлэнэн сарайдарынан, баанньыктарынан, туох кыалларынан хараллаахтыыра туох кистэлэ кэлиэй. Онон, өлүк хараллыыта тыын суолталаах социальнай боппуруос буолар.
Бу күннэргэ улуустааҕы К.А.Серебрякова аатынан киин балыыһаҕа “Өлүгү харайар холодильник” тиэллэн кэллэ. “Икки камералаах, ол эбэтэр икки киһи өлүгүн тэҥинэн харайар кыахтаах холодильнигы Түгэһиир нэһилиэгин салалтата үбүлээн ылан биэрдэ. Бу олус наадалаах тэрил. Ирдэбил быһыытынан өр хараллар өлүк хайаан да сөптөөх сиргэ, температураҕа хараллыахтаах. Маннык холодильник сыты таһаарбат, салгыны тымнытар анал функциялардаах. Онон, олохтоох дьаһалта салалтатыгар махталбыт улахан”, — быстах кэмҥэ кыл.быраас э.т. Семен Винокуров.
“Кэлиҥҥи кэмҥэ биһиги өлүк экспертизаны кэтэһэр кэмигэр хараллыытыгар кэккэ ыарахаттары көрсөр буоллубут. Онон, маннык тэрил киин балыыһаҕа баар буолара олус наадалааҕын өйдөөн аукцион биллэрбиппит. Москва куораттан ООО “Фарм Инвест” кыайан 797 695 солк. сыаналаах холодильныгы Дьокуускайга диэри тиэртэ. Саккырыырга диэри бэйэбит кыахпытынан тиэртибит, “-Түгэһиир нэһилиэгин баһылыга Сергей Аликов.
Яна Рожина