Бу күннэргэ биир дойдулаах уолчааммыт Диас Сергеев Дагестаҥҥа өрөспүүбүлүкэтээҕи Расул Гамзатов 100 сааһын туолбут үбүлүөйдээх күрэҕэр 1 миэстэ буолла диэн үөрүүлээх сонун бассаап ситимин нөҥүө тэлэһийэ көттө! Биир дойдулаахтара кыракый бөҕөһү өрөгөйдөөх кыайыытынан эҕэрдэлээн туран үөрүүтүн үллэһиннилэр. Кыра бөҕөс ситиһиитэ манан эрэ муҥурдаммат! Махачкалааҕа Ярыга Шугаев аатынан спортивнай оскуола өрөспүүбүлүкэтээҕи күрэҕэр кыайыы өрөгөйүн билэр. Избербашка Каякент спортивнай оскуолата тэрийбит өрөспүүбүлүкэтээҕи күрэҕэр эмиэ бастаата.
Дьарҕаалаахтан төрүттээх уолчаан “хайаларын оҕотой?”, «туох күрэхтэһиитигэр кыттан кыайбытый?” диэн ыйытыктар үгүс дьону интэриэһиргэттилэр. Онон биһиги тустуук уолчаан күн күбэй ийэтин Христина Стручкованы кытта кэпсэтэн, сырдата түһэригэр көрдөстүбүт.
«Диас бэс ыйын 25 кунугэр 2012 с. Дьарҕаалаах нэһилиэгэр күн сирин көрбүтэ. Мин, ийэтэ Стручкова Христина Николаевна 16 сыл устата Дьарҕаалаах оскуолатыгар учууталлаабытым. 5 оҕоттон, 3 уолтан кыралара буолар. Аҕата Сергеев Эдуард Александрович Сунтаартан төрүттээх.
Маҥнайгы кылаастан уолум Дьокуускайдааҕы саха политехническай лицейыгар үөрэнэ киирбитэ, ситиһиилээхтик үөрэнэр. Үөрэҕэр хорошист, математика предметигэр олимпиадаларга кэккэ ситиһиилэрдээх. 2 кылаастан Дьокуускай куорат 5 №-х оҕо аймах спортивнай саалатыгар дьарыктанар, тренердара Сивцев Дь. Н. уонна Прохоров А. Н.
Бэйэтин ыйааһыныгар куорат, өрөспүүбүлүкэ күрэхтэригэр 2-с сылын чөмпүйүөн. 2022 с. Благовещенскай куоракка «Кубок мэра» 2 миэстэ, быйыл 2023 с. Благовещенскайга «Кубок Содружества» 1 миэстэ буолбута. Тохсунньуга 2022 с. Москуба, Анапа куораттарынан сборга сылдьан курэхтэргэ чөмпүйүөн буолан кэлбитэ. 2023 с. Казахстаҥҥа сборга сылдьан, » Игры Батыров» 1 миэстэ буолбута. Пинигин П.П норуоттар икки ардыларынааҕы күрэҕэр былырыын 3 миэстэ, быйыл 2 миэстэ буолла, Кыргызстан уолугар хотторон.
Бу сайын Дагестаҥҥа сбордана сылдьар. Хасавюрт, Махачкала, Избербаш куораттарга буолбут өрөспүүбүлүкэтээҕи курэхтэргэ чөмпүйүөн буолла. 26-28 киилэ ыйааһыҥҥа тустар.
Диас дьарыктанарын сөбүлүүр, көтүппэт, эппиэтинэстээхтик сыһыаннаһар, элбэх доҕордоох. Күрэхтэргэ спорт энтузиаһа Петр Стручков элбэхтик көрсөр, тренердарыгар:» Диас биһиэнэ, Бытантай уола»- диирин астынар. Барыта холбоон 48 мэтээллээх, кубок эмиэ толору. Быйыл 4 кылааһы бүтэрдэ. Тустар дьоҕурун айылҕалаах диэн бэлиэтии көрөллөр, ол курдук эһэтин убайа В.Н. Стручков классическай тустууга улууспут бастакы спорт маастара, эһээлээтэр эһэтэ М.Н. Другин тустууга спорт маастара», -диэн ийэтэ Христина Николаевна бэйэтин сааһыгар үгүс үрдүк кыайыылардаах, ситиһиилэрдээх, спорт очуоһун эрэллээхтик дабайан эрэр уолчаанын туһунан кэпсээтэ.
Эбээн-Бытантайтан төрүттээх уолчааммытыгар Диаска мэлдьи кыайыы көтөллөөх, ситиһии сиэтиилээх сылдьан, инникитин даҕаны норуоттар икки ардыларынааҕы спорт киэҥ туонатыгар төрөөбүт дойдутун, бар дьонун дорҕоонноохтук ааттата турарыгар баҕарабыт!