Ат сүүрдүүтүн сэҥээрбэт саха диэн суоҕа буолуо. Бу күннэргэ Саккырыыртан Дьааҥы улууһугар күрэхтэһэ барбыт уолаттарбыт туһугар «ыалдьан”, утуйар уу умнулла сыыста. Хотугу хоһуун уолаттарбыт Дмитрий Бочкарев, Иван Колесов, Герасим Стручков дьиҥ саха аттарынан сүүрдэн, ситиһии бөҕөтүн ситиһэн, уопсай хамаанданан түмүккэ 3 бочуоттаах миэстэни ыллылар!
Ыаллыы сытар Дьааҥы улууһа төрүттэммитэ 95, Улуу Кыайыы 80 сылыгар туһаайыллыбыт үбүлүөйдээх ыһыах чэрчитинэн ыытыллыбыт ат сүүрдүүтүн бастакы күнэ биһиги уолаттарбытыгар сүрдээх ситиһиилээхтик түмүктэммитэ.
Аһаҕас халлаан анныгар, ардах-хаар быыһынан, дохсун сүүрүктээх эбээлэрбитин харбатан туораан, 3 көстөн ордук сири айаннаан тиийбит эр хоһууннарбыт, тулуурдаахтарынан аатырар сахабыт аттара кыраһыабай киирсиилэри көрдөрбүттэрэ.
Бу күн Хоптолоох ипподрома араас нэһилиэктэртэн ат спордун сэҥээрээччилэрин түмэн ньиргийэн олорбута. Куйаар ситимин сибээһэ төһө да мөлтөх буоллар, эбээн-бытантайдар социальнай ситимнэри манаан, уолаттарбыт сурахтарын сураһан, үгүс киһи түлүпүөн тутан олорбута саарбаҕа суох буолуо. Ол курдук, “Дулҕалаах – Хос Алаас” диэн ааттаах холбоһук хамаанда тэриллэн, бастакы күн түмүгэ маннык буолбута:
800 м.ыраахха:
1-кы сүүрдүү
Тамерлан (Арыылаах)
Шоколад (Табалаах2)
2-с сүүрдүү
Авраам (Табалаах1)
Доҕор (Элгэс)
3-с сүүрдүү
Орлик (Дулҕалаах-Хос Алаас)
Үтүлүк (Арыылаах) личник
1200 м.ыраахха:
1-кы сүүрдүү
Дохсун (Столбы)
Сындыыс (Элгэс)
2 –с сүүрдүү
Уоллара (Дулҕалаах-Хос Алаас)
Уолчаан (Арыылаах) личник
3-с сүүрдүү
Хайылык (Табалаах3)
Чуораанчык (Дулҕалаах-Хос Алаас)
1600 м.ыраахха:
1-кы сүүрдүү
Хотой (Табалаах3)
Харачаас (Арыылаах)
2-с сүүрдүү
Сындыыс (Табалаах1)
Бастыҥ (Элгэс)
2400 м.ыраахха:
1-кы сүүрдүү
Суордаайы (Столбы)
Уолчаан (Дулҕалаах-Хос Алаас)
2-с сүүрдүү
Араҕас (Табалаах1)
Баҕалаах (Табалаах2)
4800 м.ыраахха:
1-кы сүүрдүү
Нохоо (Арыылаах)
Быйаҥ (Борулаах) личник
2-с сүүрдүү
Звезда (Дулҕалаах-Хос Алаас)
Долгун (Адычча)
Күүстээх күөн көрсүү түмүгүнэн “Дулҕалаах-Хос Алаас» холбоһук хамаандата финалга киирэн, иккис быһаарыылаах күнү бары долгуйа күүппүппүт. Иккис күҥҥэ тыҥааһыннаах сүүрдүүгэ 4800 м. ыраахха Звезда 2 миэстэ, 2400 м. ыраахха Уолчаан эмиэ 2 миэстэни ситиспиттэрэ. 1200 м. ыраахха Чуораанчык 3 миэстэ буолбута. Уопсай хамаанданан түмүккэ 1 миэстэни “Элгэс”, 2 миэстэни “Табалаах-1”, 3 миэстэни “Дулҕалаах-Хос Алаас” холбоһук хамаандата ситиһэн, үөрүү өрөгөйүн туппуттара.
Киэҥ түһүлгэҕэ улууспут аатын ааттаппыт уолаттарбытын өйөөн, Эбээн-Бытантай улууһун дьаһалтата 50 тыһ. солк.харчынан бириис туруоран, эдэр дьону спортка көҕүлүүр төһүү буолла. Саккырыырга сыспай сиэллээҕи, күн дьөһөгөй оҕотун утумнаахтык иитэр, дэлэтэр, КФХ “Алаас” биир улахан кэтэх хаһаайыстыбалаах Лена Бочкарева «Саамай эдэр, кэскиллээх ат сүүрдээччи» номинацияҕа туруорбут убаһа сертификатын Арыылаахтан Вячеслав Стручков — 2009 с.т ылла. Бочкаревтар династиялара туруорбут 50 тыһ. солк. харчыны «Саамай саастаах жокей» номинацияҕа 56 саастаах Адыаччы нэһилиэгин олохтооҕо Геннадий Степанович Чириков тутта.
Уолаттарбыт салгыы бэс ыйын 27 күнүгэр Арыылаах нэһилиэгэр ыытыллар ат сүүрдүүтүгэр күрэхтэһэ айаннаабыттара. Бу да сырыыга дьулуурдаахтык киирсэн, ситиһии көтөллөөх кэлиэхтэрэ диэн эрэнэбит.
Сардаана Копырина