“Чаҕылый, саҥа сулус” күрэх Саха Өрөспүүбүлүкэтин култуураҕа туйгуна, улууска култуура салалтатын салайааччыта Степан Слепцов көҕүлээһининэн 1998 сыллаахха аан маҥнайгытын ыытыллыбыта.
Быйылгы күрэс улууска култуура эйгэтигэр ураты суолун хаалларбыт, чаҕылхай уолбут, анал дьайыы кыттыылааҕа Иван Горохов сырдык кэриэһигэр ананан ыытылынна.
Сыанаҕа Иван Семенович байыаннай таҥастаах күлэн мичилийбит мэтириэтэ турбута, мустубут дьоҥҥо кырачаан Уйбаанчык инник мичээрдээбитинэн ыллаан чоргуйа турара, харахха көстөн ааста, биир дойдулаахтарбыт сылаастык ахтыбыттара чахчы.
Ырыа куттаахтар, барыта 11 кыттааччы сүүрдээх истиҥ, сэргэх ырыа түһүлгэтин ыстылар. Дьүүллүүр сүбэ састааба да дьоһун, улуус баһылыгын солбуйааччыта Александра Иванова, култуура салайааччыта Степан Слепцов, Р.И.Шадрин аатынан оскуолаҕа муусукаҕа учуутала Александра Слепцова киирдилэр. «Аан маҥнайгытын бу куонкуруһу мин, Кустуурга кулуупка үлэлии сылдьан тэрийбитим. Биһиги улууспутугар сүрдээх талааннаах дьонноохпут, кинилэри түмэр, айар куттарын арыйар сыалтан. 1998 сыллаахха үп – харчы кырыымчык кэмигэр, улахан таһымнаах күрэҕи тэрийэргэ ыарахаттардаах этэ. Ол да буоллар, сүрдээх киэҥ далааһыннаахтык ыытаммыт, куонкуруспут күн бүгүҥҥэ диэри тиһигин быспакка ыытылла турарыттан үөрэбин. Оччолорго нэһилиэк баһылыга А.Д. Юмшанова, исписэлиистэр Д.Е.Слепцова, С.Н.Слепцова, кулууп дириэктэрэ М.И.Саргина, оскуола дириэктэрэ С.С.Черепанова улаханнык өйөөн көмөлөспүттэрэ, ”- диэн Степан Степанович сылаастык ахтар.
Дьоро киэһэ устата икки бөлөххө арахсан, ырыа арааһа дьиэрэйдэ, ытыс тыаһа дохсуннук доргуйда. Маҥнайгы түһүмэххэ кыттааччылар патриотическай тыыннаах ырыаны, иккискэ талбыт ырыа толордулар. Толоруу маастарыстыбата, таҥас – сап, сыанаҕа туттуу — хаптыы уонна ордук сүрүнэ — талаан учуоттанна.
Сити курдук, долгутуулаах түмүк маннык буолла.
14-18 саастаахтарга
Гран-при — Июлиана Неустрова (Кустур);
1 ист Лауреат — Максим Горохов (Джаргалах);
2 ист. Лауреат — Святослав Слепцов (Кустуур);
3 ист. Лауреат —Кирилл Слепцов (Кустуур);
1 ист Дипломант — Айсен Игнатьев (Кустуур.
19-35 саастаахтарга
Гран-при — Татьяна Старостина (Саккырыыр);
1 ист. Лауреат — Татьяна Колесова (Кустуур);
2 ист. Лауреат — Александра Стручкова (Кустуур);
3 ист. Лауреат — Матрена Баишева (Дьарҕаалаах);
1 ист. Дипломант — Рамиль Горохов (Саккырыыр);
2 ист. Дипломант — Туйаара Харитонова (Дьарҕаалаах).
Анал ааттар:
“Көрөөччүлэр биһирэбиллэрэ” — Татьяна Колесова (Аллараа Бытантай МТ сертификат);
“Саҥа аат” — Святослав Слепцов (Иван Горохов дьиэ кэргэнэ Лидия Суханова харчыннан приз);
Иван Горохов бииргэ үөрэммиттэрэ уонна учуутала Елена Горохова харчыннан туруорбут анал бириистэрин Рамиль Горохов, онтон “Маранга” этнокултуурунай киин анал бирииһин Айсен Игнатьев тутан үөрдүлэр – көттүлэр.
Ханнык баҕар күрэх өйүүр дьоно суох сатаммат. Тэрийээччилэр сүрүн спонсордарыгар — МКУ “ Улуустааҕы култуура управлениета”, Эбээн Бытантантай национальнай улууһун Аҕа баһылыгар Иннокентий Стручковка, Түгэһиир, Аллараа Бытантай, Үөһээ Бытантай нэһилиэктэрин баһылыктарыгар, «Гарпан”, “Маранга”, “Дюбун” этнокултуурунай кииннэр кэлэктииптэригэр, Иван Горохов дьиэ кэргэнигэр Лидия Сухановаҕа, Иван Горохов бииргэ үөрэммиттэригэр уонна учууталыгар Елена Гороховаҕа барҕа махталларын тиэрдэллэр.