Олохтоох көҕүлээһиннэр (ППМИ) — бу нэһилиэк, куорат олохтоохторун туруорсууларынан, судаарыстыба өйөбүлүнэн тупсарыыга, инфраструктураны сайыннарыыга (оҕо оонньуур сирэ, суол, сырдык, уу) туһаайыллар бырайыактар. Кинилэр дьон кыһалҕатын бэйэлэрин кыттыыларынан быһаараллар, олохтоох бүддьүөттэн уонна өрөспүүбүлүкэттэн үп көрүллэр. Быйыл биһиги улууспутугар ханнык бырайыактар олоххо киириэхтэрэй? Бу туһунан туһааннаах салайааччылартан туоһуластыбыт.
Дмитрий Сыроватский, Түгэһиир нэһилиэгин баһылыгын солбуйааччыта:
— Быйыл Түгэһиир нэһилиэгин дьаһалтата «Олохтоох көҕүлээһиннэри өйүүр бырагыраама” куонкурсугар кыттан, 3 бырайыага бары кыайыылааҕынан тахсыбыттара. Ол курдук, «Ойгидо” түөлбэҕэ оҕо оонньуур былаһаакката, нэһилиэккэ смотровой былаһаакка, Ленина уул. суолун (кылабыыһаттан Үҥкүр күөлүгэр диэри уулусса) өрөмүөннээһин. Билигин оҕо оонньуур былаһааккатын куонкурса, аукциона тахсыбыта, сотору кэминэн ким кыайбыта биллиэҕэ. Тутуллар миэстэтэ саҥа оскуола аттыгар. Смотровой былаһаакка тутуллар миэстэтэ быһаарылла сылдьар.
Бырыгыраама үбүлээһинин мэхэньиисимин туһунан эттэххэ, нэһилиэнньэ 3-5%, олохтоох дьаһалта 15% уонна спонсордар (урбаанньыттар, юридическэй сирэйдэр) үбүлээһинин уйуналлар, онтон сүрүн үбүлээһинэ өрөспүүбүлүкэ бүддьүөтүттэн көрүллэр. Бырайыак олоххо киирэригэр үбүлээһиҥҥэ ити этиллибит 4 кыттыһааччы бары баар буолуохтаахтар. Бу этиллибит бырайыактрга уопсайа өрөспүүбүлүкэттэн 7,5 мөл. солк. көрүллэр, олохтоох бүддьүөттэн, нэһилиэнньэттэн уонна урбаанньыттартан 2 мөл. 705 тыһ. 750 солк. харчы хомуллуохтаах.
Түгэнинэн туһанан, нэһилиэкпит олохтоохторун барыгытын быйыл олоххо киириэхтээх бырайыактары харчынан өйүүргүтүгэр, нэһилиэкпит олоҕун таһыма үрдүүрүгэр, сайдыылаах, дьоһуннаах буоларыгар көхтөөхтүк кыттаргытыгар ыҥырабыт!
Смотровой былаһаакка
Аида Стручкова, Үөһээ-Бытантай нэһилиэгин дьаһалтатын исписэлииһэ:
— «Олохтоох көҕүлээһиннэри өйүүр” бырагыраамаҕа киирсэн, биһиги нэһилиэкпит биир бырайыага кыайда. Ол чэрчитинэн Западная, Школьная уулуссаларга барыта 44 устуука тимир остуолбалаах лаампалар тутуллан, киин уулуссаларбыт сандаара түһүөхтээхтэр. Билигин матырыйаал тиэллиитин күүтэбит.
Бу бырайыакка өрөспүүбүлүкэ бүддьүөтүттэн 2 мөл.500 солк., олохтоох дьаһалтаттан 380 тыһ. солк. көрүллэр, нэһилиэнньэттэн 60 тыһ. солк. хомуллар.
Онтон Кустуур нэһилиэгэр докумуон өттө итэҕэс буолан быйыл сатаан бу бырагыраамаҕа киирсибэтилэр.
Санатар буоллахха, былырыын бу бырагырааманан биһиги улууспутугар 7 бырайыак өйөбүлү ылбыта. Бу 7 бырайыак иһигэр Кустуурга оҕо оонньуур былаһаакката, Дьарҕаалаахха спортивнай саалаҕа пристрой, Западная 3/1 уулуссаҕа спортивнай былаһаакка тупсарыыта, Түгэһииргэ сыбаалканы күрүөлээһин, “Биракчан” түөлбэҕэ оҕо оонньуур былаһаакката, Портовская уулуссаҕа улууспут мэҥэ бэлиэтэ, Хотугу норуоттар Оонньууларын символлардаах успуорт сквера тутуллубута.
Сардаана КОПЫРИНА