Ыраах хоту тайаан сытар, аҕыйах ахсааннаах Эбээн Бытантай улууһуттан «Муус устар” бэстибээлгэ сүрдээх элбэх ыччаппыт кытынна. Кинилэр араас хайысхаҕа бэйэлэрин ситиһиилээхтик көрдөрөн, миэстэҕэ тиксэллэрэ олус үчүгэй, хайҕаллаах
Эдэр ыччакка аналлаах «Муус устар” бэстибээл Саха сирин бырабыытылыстыбатын көҕүлээһиинэн 2021 сылтан ыытыллар. Быйыл өрөспүүбүлүкэ бары улуустарыттан икки тыһыынча кэриҥэ эдэр дьон кытынна. Фестиваль иитинэн барыта 14 хайысханнан араас күрэстэр, күрэхтэр буоллулар. Ыччат дьоммут араас эйгэлэргэ талааннарын, кыахтарын киэҥ эйгэҕэ таһааран көрдөрдүлэр, уопут, билии ыллылар.
«Эдэр аграрий» күрэс «Создавай агропроизводство!» хайысхата «Муус устар — 2024» ыччат бэстибээлигэр бастакытын ыытыллынна. Икки лиганан кыайыылааҕы быһаардылар – үрдүкү уонна бастакы, «Абсолютный командный победитель по зоне Арктики» уонна «Абсолютный командный победитель по внеарктической зоне» бөлөхтөргө.
Биһиги дьоммут маннык үрдүк таһымнаах күрэскэ III бочуоттаах миэстэни ылар чиэскэ тиксэн, улуустарын аатын ааттаттылар.
«Үрдүк таҺымнаах фестиваль буолан ааста. БиҺиги бастакы холонуубут, онон кылаабынайа баай уопут, билии ыллахпыт. Тэрийээччилэргэ улахан махтал,»- Лена Бочкарева, т/х салалтата.
Матрена Баишева: — “Молодой Аграрий» күрэххэ 3 буолан кытынныбыт. Ол курдук, Наталья Горохова уонна Никита Старостин Кустуурга тыа хаһаайыстыбатын эдэр үлэһиттэрэ уонна мин. Бу күрэх туһунан Лена Бочкарева, улууска т/х салайааччыта кыттыҥ, диэн сүбэлээн ыыппыта.
Хамаандабытыгар агроном, зооинженер уонна урбаанньыт ирдэнэрэ. Хамаанданнан соруктары биэрбиттэрин толорон көмүскээбиппит. Быйыл бу көрүҥ бастакытын ыытыллар, онон өссө долгутуулаах этэ.Син кыах баарынан кытынныбыт, уопут ыллахпыт, онон инникитин күүскэ бэлэмнэниэхпит.»
Маны таһынан “Деловая игра” эдэр педагогтарга анаммыт хайысхаҕа кыттыыны ылбыт, Наталья Горохованы кытта кэпсэттибит.
— “Үөрэҕирии салалтатыттан “Муус устар” бэстибээлгэ кыттарга этии киирбитигэр, тутатына сөбүлэһэн, кыттыыны ылбыппыттан олох кэмсиммэппин. «Педагог будущего поколения» диэн Сахабыт сирин маҥнайгы президиэнэ М.Е. Николаев кэриэһигэр анаан ыытыллыбыта.
Наһаа улахан таһымнаах тэрээһин эбит, боруоста астынным, элбэҕи биллим-көрдүм. Бэйэм үлэм хайысхатынан буолан, элбэх туһалааҕы иһиттим, уопут бөҕө ыллым. Маннык тэрээһиннэр киһиэхэ үлэлииргэ күүс – сэниэ эбэллэр, саҥа кыымнары саҕаллар.”
Марианна СЛЕПЦОВА