Муус устар 13-16 күннэригэр өрөспүүбүлүкэбит тэбэр киинигэр бары нэһилиэктэр уонна улуустар баһылыктара үбүлүөйдээх муниципальнай тэриллиилэр Сэбиэттэрин ХX сийиэстэрэ ыытылынна.
Сэбиэт барыта 445 муниципальнай тэриллиини түмэр. Сийиэскэ биһиги улууспут Аҕа баһылыга Иннокентий Стручков, нэһилиэктэр баһылыктара Константин Старостин, Сергей Аликов, Лев Горохов кыттыыны ыллылар.
“Баһылык диэн, хас биирдии нэһилиэк, улуус олохтооҕо тирэнэр тирэҕэ, дурда-хаххха киһитэ буолар. Билиҥҥи кэмҥэ, бүгүн баһылык хас биирдии киһи кыһалҕатын билиэхтээх, ону туоратарга сүрүн өйөбүл буоларга кыһаллыахтаах. Баһылык тирээбит кыһалҕаны түргэнник, ол эрэн мындырдык быһаарарга бэлэм буолуохтаах, онно кыһаллыахтаах. Ордук болҕомтону биһиги анал дьайыы кыттыылаахтарыгар уонна кинилэр дьиэ кэргэттэригэр туһаайар ытык иэспит. Ону тэҥэ, олох ыарахан түгэнигэр киирбит дьоммутугар эмиэ сүрүн болҕомтону ууруохтаахпыт. Анал дьайыы саҕаланыаҕыттан олохтоох дьаһалталар уорганнара 1,8 млрд. солк. аҥардас матырыйаалынай көмөнү оҥордулар. Хас биирдии сыыппара кэннигэр киһи дьылҕата турар. Онон, бу өйөбүл тиэрдиитэ үлэ төһө сөптөөхтүк, чиэһинэйдик ыытыллыбыта барыта боростуойдук, арылыччы көстөр», — диэн Ил Дархан Айсен Сергеевич эттэ.
Степан Анатольевич Саргыдаев Сэбиэти салайыыга тиһиктээхтик ылсан үлэлиирин, муниципалитеттар интэриэстэрин кимиилээхтик туруорсарын, федеральнай бэбиэскэҕэ өрөспүүбүлүкэ баһылыктара кыттыыларын ситиһиилээхтик хааччыйарын бэлиэтээн туран Сэбиэт салалтатын баһылыктар Степан Саргыдаевы эрэнэллэрин этэн туран хат таллылар.
Яна РОЖИНА