Хаарҕа хаампыт суруктар
Үллүктүү тэлимнээн
Ыраас да хаар
Сирбитин сапта.
Хаар чэбдик салгынынан тыынаары
Таҕыстым мин таһырдьа.
Хаамтым саҥа хаарга
Олук үктээн,
Оргууй бардым суол устун,
Аахтым элбэх суругу
Хаарга хаампыт
Атахтар суолларынан.
Бу чиҥник үктэнэн
Эрэһиинэ сапыкы
Уллуҥун ойуутунан
Бэчээт ууран
Барбыт үлэтигэр
Хачыгаар уол.
Кини суолун ойоҕолуу
Оһуой-хоһуой үктэнэн
Олдьу-солдьу хааман
Охто сыһан
Тэмтэрийэн ылан
“Айаннаабыт» итирик сордоох.
Онтон бу
Оскуола диэки
Ойуолаабыт, ыстаҥалаабыт
Оҕо суола,
Ойуу түһэрбит
Ыраас хаарга.
Хобулуктаах
Сапыкынан чэпчэкитик
Дыгыйа хааман
Көнөтүк үктээн
Хонтуораҕа ааспыт
Кыыс-дьахтар.
Атаҕын соһон
Тайаҕар тирэнэн,
Ардыгар тохтоон,
Сынньанан
Аргыый барбыт
Саастаах кырдьаҕас.
Икки тайаҕынан
Суол хаалларан
Биир тэҥник
Эрчимнээхтик үктэнэн
Суол кырыытынан
Дайбаан ааспыт
Хаалыктаах киһи.
Аахтым хаарга хаалбыт
Атахтарын суолларынан
Бу дьон дьылҕаларын
Ким эрэ саҕалыаҕа
Олоҕун кинигэтин
Ыраас илиистэн.
Ким эрэ көнөтүк
Чиҥник үктэнэн
Олоххо суолун булуоҕа,
Ким эрэ туора хааман
Көнө да суолга
Тэмтэрийиэҕэ…
Оҕо киһи улаатыаҕа
Олох устун хаамыаҕа,
Чэгиэн суолу тутуһан
Чэпчэкитик ойуолаан
Чыпчааллары
Дабайыаҕа!
Халтараан кыайда
Хаартан үөрбүтүм
Хаары айхаллаабытым
Ол эрээри халтараан кыайда…
Хаарга албыннатан
Уу тоҥмут сирин көрбөккө
Халтарыйан оҕуннум.
Хааман иһэн эмискэ
Охтон түстүм
Көнө суолга,
Икки атахтарым
Тирэхтэрин булбакка
Тилэхтэринэн көрдүлэр.
Түөрт лабаам
Түөрт аҥыы барда,
Бэргэһэм туура ыстанан
Туллан ханна эрэ түстэ.
Суумкам барахсан
Туора ойдо.
Кэтэҕим доргуйда
Төбөм эргийдэ
Сүнньүм, моонньум
“Бадаҕа”, — тоһунна.
Сиһим сири билэн
«Ньир” гынна.
Өттүгүм өҕүлүннэ
Өрүһүйүөх киһи
Чугаһынан
Отой көстүбэтэ.
Сыта түһээт
Ойоҕоспор сэрэнэн
Оргууй эргийэн
«Түөрт атах” буолан
Туран кэллим
Хаартан оронон.
Икки түүннээх
Күн сытан,
Укуоллатан, эмтэнэн
Оһоруннум
Халтараан обургу
Содулун.
Халтараан
Суоҕа буоллар
Күһүн барахсан
Сымнаҕас сылаас
Хаара,
Чэбдик ыраас
Салгына
Өссө да бара илик
Күнэ
Кэрэхсэтэр
Кэрэтэ
Миэхэ мэлдьи
Күндү!
Хаастар аастылар
Хотуттан соҕуруу
Үс күн субуруччу
Бөһүөлэк үрдүнэн
Хаастар аастылар.
Кыырай халлаан кырсынан
Кынаттыы сэлэлээн
“Кыҥкыр-лыҥкыр»
Ырыалаах хаастар бардылар.
Тула маҥан хаар
Тоҥ күөллэр, көлүччэлэр
Ханна аһаан-сынньанан
Барахсаттар сылдьаллар.
Олус да аһынным
Халлаан көҥүл көтөрдөрүн
Айылҕа айбыт сокуонунан
Айаннаан эрдэхтэрин!
Хастара тыыннаах тиийэр
Соҕуруу сылаас дойдуга
Хастара аччыктаан сылайан
Аара суолга охтор…
Айылҕа сокуона кытаанах
Элбэхтэн аҕыйах ордор
Ол эрэн олох салҕанар
Ол төгүрүк ии иһигэр.
Хаастар эһиил эмиэ
Хоту сиргэ,
Төрүү-ууһуу
Төннүөхтэрэ турдаҕа!
Светлана Горохова-Харысхаана
Хаартыскаҕа Оксана Крижановская түһэриитэ