Киин итиитигэ холбонуу, ханна да тыын суолталаах. Ордук, тоҕус ый томороон тымныы кыһыннаах хоту сир олохтоохторугар дьиэ – уот сылааһа, үлэлиир усулуобуйа тупсаҕайа, мас – муус кыһалҕата турбата олох уйгутун түстүүрэ чахчы. Ыраах тайаан сытар улуустарга киин ититиини киллэрии, хочуолунайдары, улахан эбийиэктэри тутуу суол – иис күчүмэҕэйинэн, үтүмэн үгүс үбүлээһини эрэйэринэн харгыстары үөскэтэр. Маныаха өрөспүүбүлүкэбит, улууспут салалталара, нэһилиэктэр дьаһалталара биир ситимнээхтик, үтүө түмүгү ыларга сыралаахтык үлэлииллэр.
Бу күннэргэ Аллараа Бытантайга «Восточные Энергетические Системы» хааччахтаммыт тэрилтэ исписэлиистэрэ үлэлээтилэр. Бу тэрилтэ мас кыырпаҕынан оттуллар киин хочуолунай тутуутугар генеральнай бэдэрээччик буолар.
Иннокентий Стручков, улуус баһылыга: «Улахан эбийиэкпит тутуутун тула генеральнай бэдэрээччик, проектировщик буолан миэстэтигэр үлэлээтибит. Киин ититии ситимин трассировкатын, тэхинииичэскэй боппуруостары сиһилии чопчулаатыбыт. СӨ ГУП ОДьКХ-тын бу эбийиэккэ оробуочай бөлөҕүн кытта интернет нөҥүө тутуу тэрээһинин, таҥыытын уонна матырыйаал тиэрдиитин боппуростарын ырыттыбыт. Саха Өрөспүүбүлүкэтин бырабыыталастыбатын уонна ОДьКХ министиэристибэтин тустаах үлэлэрин түмүгэр бүгүҥҥү күҥҥэ бу тутуу үбүлээһинэ федеральнай бүддьүөттэн киирэн турар, онон хочуолунай кэлэр сылга туох да харгыһа суох тутуллан үлэҕэ киирэригэр эрэнэбит. Бэйэм өттүбүттэн Кустуур олохтоохторуттан дьиэҕит, сиргит докумуоннарын түргэн кэмҥэ нэһилиэк дьаһалтатыгар тиэрдэргитигэр этэбин, бу даннайдар электроннай информационнай систиэмэҕэ киирэллэрэ, эбийиэк тутутун биир сүрүн ирдэбилинэн буолар.»
Роберт Колесов, “Аллараа Бытантай нэһилиэгэ” олохтоох дьаһалта баһылыга: «Биһиги нэһилиэккэ проектировщик Андрей Миллиардер уонна генеральнай бэдэрээччик Рамиль Еникеев, улуус баһылыга Иннокентий Стручков уонна ОДьКХ филиалын дириэктэрэ Максим Горохов кэлэн киин хочуолунай тутуутун тула үлэлээтилэр. Рамиль Мазитович бу сайын эмиэ кэлэн, тутуу ыытыллыахтаах сирин көрө сылдьыбыта. Бу хочуолунайга холбонууга бүгүҥҥү күҥҥэ 95 ыал испииһэккэ киирэн тураллар. Генеральнай былааны, турбалар тардыллар хайысхаларын барытын ымпыгын – чымпыгын көрдүлэр, үөрэттилэр. Хочуолунай тутуутугар урукку баһылык Гаврил Горохов 2019 сылтан күүскэ үлэлэспитэ диэххэ наада. Бары салалта тиһиктээх үлэтин түмүгэр хочуолунайбыт тутуллара чопчу быһаарылынна. Мантан салҕыы иннибитигэр матырыйаал тиэрдиитэ, олохтоохтор дьиэлэрин, сирдэрин докумуоннарын реестрга кииллэрии уонна да атын үгүс элбэх үлэ күүтэр.”
Яна РОЖИНА