И.Н. Слепцов аатынан агро хайысхалаах Кустуур орто оскуолата оҕону үлэнэн иитиигэ тиһиктээхтик ылсан үлэлиир. Табаһыт оҕолор «Мэрлэнкэ” көс оскуола салаатынан ыстаадаҕа баран көмөлөһөллөр, сорохтор Кумах Сыһыыга от оттууллар, бөһүөлэк иһигэр хаалбыттар оҕуруот аһын үүннэрэллэр, куурусса иитиитинэн дьарыгыраллар. Онтон бэҕэһээ нэһилиэккэ өссө биир үөрүүлээх түгэн үүннэ. Ол курдук, оскуола оҥорбут “Уйа” диэн ааттаах бырайыагынан куурусса дьиэтэ тутуллан үөрүүлээх арыллыыта буолла!
«Тыа хаһаайыстыбатын сайыннарыыга Ил Дархан Айсен Николаев сүрүн соруктарын, бырагырааматын толорууга баар элбэх стратегическай салаалартан биһиги, И.Н. Слепцов аатынан Кустуурдааҕы агрооскуола быйылгы үөрэх дьылыгар бырайыак оҥорон, ол сүнньүнэн күүскэ үлэлэһэммит, «Уйа” диэн ааттаах куурусса дьиэтэ тутуллан үлэҕэ киирдэ.
Бэйэбит туспа, тыа сиригэр, хотугу эргимтэҕэ хаһаайыстыбаны тэрийии салаатыгар үлэлэһэн, түргэнник ситэр салааҕа киирэммит «Уйа» диэн ааттаан бырайыакпытын олоххо киллэрбиппититтэн бука бары олус диэн үөрдүбүт.
Көтөрбүт дьиэтэ — кууруссаны иитиигэ биир сүрүн, түргэнник бородууксуйа биэрэр салаа буолар. Билигин иитиллэ турар кууруссаларбыт ыраах сытар Ставропольскай уонна Московскай уобаластан сымыыт уонна эттээх — сымыыт боруодаларын: Ломан-Браун уонна Пушкинскай боруода тахсан бары үөрүү өрөгөйүн билбиппит. Чоппуускаларбыт улаатан бастакы сымыыппытын атырдьах ыйын 6 күнүгэр ылбыппыт, үлэбит түмүгэ көстөн, ылсыбыт санаабыт өссө күүһүрбүтэ. Биһиги курдук ыраах, тыйыс усулуобуйалаах хоту сиргэ олорор дьоҥҥо, тыа сиригэр маннык үлэлэр кырдьык дьоһуннаах уонна ас-үөл экэниэмикэтигэр сүрүн оруолу ыларын биллибит. Бу хайысха өссө да сайдан, бородууксуйабыт элбии-хаҥыы турдун!
Сэтинньи 6 күнүгэр «Уйа» көтөр дьиэтин аһыыллыытын үөрүүлээх быһыыга-майгыга ыыттыбыт. Үөрүүлээх күҥҥэ лиэнтэни быһарга дириэктэрбит Матрена Алексеевна Горохованы, көрөн-истэн үлэлии олорор педагог-бэтэрээн Ольга Николаевна Рожинаны ыҥырдыбыт. Ол кэннэ «Уйа» дьиэтигэр экскурсия буолла. Оскуола үөрэнээччилэрэ бука бары үөрүүгэ кыттыһан куурусса иитиллэр дьиэтин көрдүлэр. Нэһилиэнньэҕэ чоппуускалары таһааран атыылаан, күһүн эттээх боруодабытын дьаарбаҥкаҕа амсатан, билигин учууталларга бэйэбит сымыыттарбытын уочаратынан атыылаан саҕалаатыбыт. Онтон кэлин элбээтэҕинэ нэһилиэнньэҕэ атыылыыр былааннаахпыт,» -диэн Кустуур орто оскуолатын дириэктэрин иитэр үлэҕэ солбуйааччыта Надежда Слепцова үөрүүлээх сонуну үллэһиннэ.
Хаартыскаҕа түһэрдэ 9 кылаас үөрэнээччитэ Ранид Горохов