Арассыыйаҕа Педагог уонна настаабынньык сылыгар туһуланан биһиги улууспутугар араас тэрээһиннэр сыл устата тиһиктээхтик ыытыллаллар. Бу бэлиэ сылга бочуоттаах сынньалаҥҥа олорор Саккырыыр орто оскуолатын бэтэрээн учууталыгар, үгүс көлүөнэ ыччаты үөрэх-билии аартыгар сирдээбит Елена Ильинична Поповаҕа Түгэһиир нэһилиэгин олохтоох дьаһалтата уонна улуустааҕы социальнай харалта үлэһиттэрэ дьиэтигэр-уотугар күүс-көмө буолан олус үөртүлэр, уйадыттылар.
«Мин соҕотох олорор кырдьаҕас киһи дьиэбин-уоппун сууйан-сотон өрө тардарга күннэтэ кыһалҕалары көрсөбүн. Аны кыбартыырам аана олус эргэрэн, таһырдьаттан тымныы салгын киирэн үргүйэ олорбута. Ону хайдах эмит быһаарар толкуйга киирэн, ытамньыйыахпар диэри санаарҕаан, ыксааммын олохтоох дьаһалтаттан уонна социальнай харалта тэрилтэтиттэн көмө оҥороллоругар көрдөспүтүм. Үөрүөҕүм уонна долгуйуоҕум иһин, кыһалҕабын чугастык ылынан, көрдөһүүбүн быһа гыммакка, тутатына кэлэн көмөлөстүлэр. Социальнай харалтаҕа үөрэхтэрин саҥа бүтэрэн үлэлии сылдьар эдэркээн кыргыттары Елена Ефимова салайан аҕалан, дьиэбин-уоппун ып-ыраас гына сууйан-сотон биэрдилэр. Елена Егоровна эбиитин илии тутуурдаах, кэһиилээх кэлэн, бэйэ оҕуруотугар үүннэрбит хортуоскатын, отон барыанньатын бэрсэн олус долгутта, үөртэ. Олохтоох дьаһалта үлэһиттэрэ, Дмитрий Сыроватский ааммын оҥорорго көмө харчы биэрэн, ону уус илиилээх Владимир Другинныын кэпсэтэн, бэртээхэй аан оҥоһулунна! Владимир Ильич барыта бэйэтин матырыйаалынан саҥа холуода, аан оҥорон наһаа да үөрдүм уонна махтанным.
Аҕыйах кэминэн сотору Учуутал күнэ уонна төрөөбүт күнүм буолара чугаһаата. Миэхэ көмө буолбут туһааннаах үлэһиттэр бары да үөрэппит оҕолорум эбит, кинилэр мин кыһалҕабар болҕомто уураннар, бу кэлэн иһэр бэлиэ түгэннэргэ улахан бэлэх курдук буолла,» — диэн кырдьаҕас учуутал Елена Ильинична барҕа махталын тириэртэ.