Ийэ буолуу – хас биирдии дьахтар олоҕор саамай дьоллоох уонна эппиэтинэстээх кэмэ. Бүгүн Саха сиригэр бэлиэтэнэр Ийэ күнэ – бу олох үөрүүтүн, сир үрдүгэр баар саамай сылаас, истиҥ иэйиини тиэрдэн туран махтанар ураты бырааһынньыкпыт. Бу кэрэ күҥҥэ аныгы үйэҕэ ийэ буолуу өйдүбүлүн уонна дьиэ кэргэн сыаннастарын үрдүктүк тутар, элбэххэ холобур буолар эдэр ийэ туһунан кэпсиэхпин баҕарабын.
Ньургуйаана Петровна Данилова – элбэх оҕолоох эдэр ийэ, ол эрээри оҕо көрүүтүн таһынан бэйэтин сайыннарыыга, үлэҕэ-хамнаска уонна уопсастыбаннай олоххо көхтөөхтүк кыттар. Кини дьиэ кэргэнигэр үгэс уонна бэрээдэк бастакы миэстэҕэ турар. Оҕолорун кыра эрдэхтэриттэн дьарыктаах буоларга, айылҕаны таптыырга уонна улахан дьону ытыктыырга үөрэтэр.
Ньургуйаана – иис уонна сатабыл эйгэтигэр бэйэтин була сылдьар дьоҕурдаах киһи. Кини иллэҥ кэмигэр оҕолоругар таҥас тигэр, оҕуруонан тиһэн араас сахалыы, эбээннии тыыннаах киэргэллэри оҥорор.
Эдэр ийэ сүрүн кистэлэҥнэрэ: кэргэнин уонна эбэлэрин көмөлөрүн сыаналыыр, туһанар. Дьиэ кэргэҥҥэ бэйэ-бэйэни өйдөһүү уонна өйөһүү баар буоллаҕына эрэ хас биирдии ийэ сайдар кыахтанар. Олох кыра да үөрүүтүттэн күүс-уох ылар уонна сылайбыт кэмҥэ уоскулаҥы була үөрэнии.
Бу курдук, сырдык дууһалаах, олоххо көхтөөх эдэр ийэлэрбит – биһиги инники кэскилбит көлүөнэтин иитэр кэрэ дьоммут буолаллар.
Ийэ күнүнэн бары эдэр ийэлэргэ куруук сырдыгы, кэрэни эрэ санааҥ диэн баҕа санаабын тиэрдэбин.
Нина Софронова – Туйгууна, Дьарҕаалаах бөһүөлэгэ