Бу күннэргэ улуус киинигэр Дьокуускайдааҕы харах клиническэй балыыһатыттан быраас Дьячковский Максим Николаевич, сиэстирэ Хобусарова Айталина Михайловна кэлэн үлэлээтилэр.
«Биһиги Эбээн-Бытантай улууһугар икки сыл буолан баран кэллибит. Өрөспүүбүлүкэбит араас улуустарыгар сылдьан аҕам саастаах дьоҥҥо киэҥник тарҕаммыт хатараактаны ылыы эпэрээссийэлэрин оҥоробут.
Эһиги улуускутугар бастакы күҥҥэ 17 эпэрээссийэ буолла. Иккис күҥҥэ 10, уопсайа 27 эпэрээссийэни оҥордубут. Киһинэн аахтахха -17. Ол 17 киһиттэн аҥаара иккис харахтарын иккис күҥҥэ оҥорторбуттара.
Харах ыарыылаахтар сүрүнэ сааһырбыт дьоннор. Эдэрдэр эмиэ бааллар. Төрүөҕүттэн хатараакталаах кыыска эпэрээссийэ оҥоһулунна. Уонна хараҕын эчэппит уолга маҥхайбыт хараҕын хрусталигын ылан, үчүгэйдик көрөр буолла, астынна.
Биһиги маннык улуустарынан кэрийэ сылдьан эпэрээссийэлэри оҥорор буолбуппут 10 тахса сыл буолла. Ол иһин уопуттаах, сатыыр дьон сылдьар буоланнар эпэрээссийэлэр этэҥҥэ ааһаллар диэн бэлиэтиэм этэ.
Эһиги улуускутугар уопуттаах, билиилээх фельдшер Сахаяна Егоровна үлэлиир. Кини дьону эпэрээссийэҕэ эрдэ бэлэмнээн, биһиэхэ улахан күүс-көмө буолла.
Эпэрээссийэни ааспыт дьон биир ый устата анаабыт харах хаапылатын куттуохтарын уонна сырдык күҥҥэ хараҥа ачыкыны кэтэ сылдьыахтарын наада.
Диспансернай учуокка элбэх, 20-30-ча киһи хомулуннаҕына, өссө да кэлэн миэстэтигэр эпэрээссийэлэри оҥоруохпут,» — диэн офтальмохирург Максим Николаевич сырдатта.
Маннык миэстэтигэр, ыраах айаннаабакка сөптөөх медицинскэй өҥөнү ылар олус туһалааҕын, табыгастааҕын хоту сир олохтоохторо бэлиэтииллэр.
“Сахабыт сирэ олус киэҥ, ыраах сытар, суола-ииһэ суох нэһилиэктэр элбэхтэр. Дьэ, бу маннык усулуобуйаҕа туһааннаах быраастар миэстэтигэр кэлэн, өрөспүүбүлүкэ хас биирдии олохтооҕор, ордук сааһырбыт дьон олохторун хаачыстыбата тупсарыгар кыһаллаллара хайҕаллаах. Түгэнинэн туһанан, офтальмохирург Дьячковский Максим Николаевичка, хирургическэй медсиэстирэтигэр, үлэтигэр үрдүк эппиэтинэһи сүгэн бэлэмнээбит окулист-фельдшербитигэр Слепцова Сахаяна Егоровнаҕа, медсиэстирэ Петрова Дария Мировнаҕа, стационар дьиэтин дьуһуурунай медсиэстирэлэригэр Попова Розалияҕа, Степанова Янаҕа, медсиэстирэ көмөлөһөөччүтүгэр Готовцева Еленаҕа, бары да уопуттаах, үлэлэригэр бэриниилээх, доҕордуу эйэҕэс, бэйэ — бэйэлэригэр көмөлөсүһэр балыыһа кэлэктиибигэр, ыарыһахтарга барыларыгар олус кыһамньылаах, амарах сыһыаннарыгар барҕа махтал тылларын тиэрдэбин! Орто дойду туох баар үтүөтүн — кэрэтин, үлэҕитигэр үрдүк ситиһиилэри, үтүө доруобуйаны, олоххутугар дьолу!» — Елизавета Старостина.