Саха тылын учууталларын II съеһин көрсө «Мин тылым дьылҕата» уонна саха итэҕэлин туруулаһааччыларга «Өбүгэм үөрэҕэ – Итэҕэл!” бу икки хоһооммун аныыбын!
Мин тылым дьылҕата
Сайаҕас санаалаах,
Саймаархай саҥалаах,
Самныбат саргылаах
Сахам дьоно!
Төрөппүт ийэбит,
Айбыт аҕабыт,
Өбүгэ дьоммут
Саҥарбыт саҥаларын,
Иһирэх ийэ тылларын,
Билиҥҥи сахалар,
Биһиги
Төһө харыстаан
Бүөбэйдээн
Илдьэ кэллибит
Бу күҥҥэ?!
Тыллана да илигиттэн
Тылын бутуйбут
Төрөппүт оҕобут,
Төлөпүөнтэн үөрэммит аатыран
Түктэри кэмэлдьилэннэ,
Атын омук тылынан
Саҥаран былдьыгыраата,
Туспа омук тылынан
Тыллаһан турда!
Куорат дьоно
Саха буолалларын
Кубарыччы мэлдьэһэн
Төрөппүт оҕолорун
Төрөөбүт тылыттан
Төрүт тэйиттилэр!
Үөрэхтээх ыччаппыт эмиэ
Төрүт тылыттан
Төрдүттэн аккаастанан
Түҥнэри хайыһар идэлэннэ…
Атын омук тылынан
Алтыһарын сөбүлээтэ,
Туспа омук тылынан
Тууһугуран чубугураата.
Ийэ оҕотун кытта
Саха сахатыныын,
Эбээ-эһээ эмиэ,
Олуонатык да иһилиннэр,
Олуттаҕастык да буоллар
Нууччалаабыта буолан
Муҥнаннылар!!!
Бу туох алдьархайа
Омукпар ааҥнаата,
Туох иһин, тоҕо
Айыы тылбытын
Атарахсыттыбыт,
Иһирэх ийэ тылбытын
Атаҕастаатыбыт,
Арҕааттан кэлэр
Алдьархайга
Ааммытын тэлэччи
Астыбыт?!
Оо, хайдах биһиги
Харыан тылбытын
Хараҥа күүстэртэн
Хараанныыбыт?!
Өлбөт үөстээх
Үйэлээх тылым
Өлөр – өһөр түгэнигэр
Мин — саха, кытта өһөбүн!
Күн сириттэн күрэнэбин
Күдэриккэ көтөбүн,
Сиик буолан симэлийэн
Сиргэ иҥэбин,
Туман буолан тунаарыйан
Тумарыкка сүтэбин…
“Манна хаһан эрэ
Саха омук,
Олорон ааспыта ээ” — диэн
Сирбин ыйыахтара!
Халыҥ хаххам
Харысхалым,
Мин төрөөбүт төрүт тылым!
Кылыһахтаах ырыам,
Дорҕоонноох тойугум,
Оһуордаах оһуокайым
Бу барыта – мин тыыным!
Ийэ тылбыт
Үйэлэргэ сүппэккэ
Үүнэ-сайда туруоҕун,
Төлкөбүтүн түстүөҕүн,
Толкуйдарын
Тобулуоҕун доҕоттоор!
Өбүгэм үөрэҕэ – Итэҕэл!
Өөр да өр бэйэбин
Көрдөөтүм,
Өһүллэр күүспүн бараатым.
Сиргэ-халлааҥҥа да тиийдим,
Сулустартан сурастым,
Ыйга ытынным,
Күҥҥэ көттүм,
Күөх далайга умустум,
Хайалар хаспахтарыгар киирдим,
Адаар арҕастарыгар ытынным,
Аарыгырар аартыктарынан айаннаатым,
Сири сиксигинэн сиэллим,
Сири-сибиири кэрийдим,
Үгүс да күнү-дьылы бараатым,
Үтүмэн да сылларбын сүтэрдим,
Хаарыан да күннэрбин
Халтайга хааллардым,
Күннээҕи бүппэт түбүккэ,
Быыл буолар быстах сорукка!
Бэйэбин көрдөөтүм булаары,
Сиргэ-халлааҥҥа стээри.
Эмискэ, үөһэттэн
Бу сиргэ кэлбит олоҕум
Анала атынын
Айыылар эттилэр:
Өбүгэм үгэһин салҕыахтаах,
Үйэлээх кэриэһин этиэхтээх,
Тыл тыыннаах сүмэтин
Бар дьоммор тиэрдиэхтээх,
Бу сиргэ кэлбиппин ананан,
Уран тыл кэрэтин айаары,
Үйэни-олоҕу туойаары,
Сырдыгы-ырааһы ыһаары,
Дууһа сылааһын саҕаары,
Хараҥа Күүстэрдиин харсаары,
Өй-санаа күүһүнэн кыайаары,
Өлбөтү-үйэлээҕи этээри,
Өбүгэм үөрэҕин тэнитээри,
Үөһэттэн айыллан
Кэлбиппин өйдөөтүм…
Мин түҥ былыргы омукпун,
Айыы Хаан оҕотобун,
Улуу урааҥхай сахабын,
Мин бэйэм кинкиниир халлааммын,
Мин бэйэм дириҥ далайбын,
Мин бэйэм умайар сулуспун!
Мин бэйэм олоҕу
Салайар сахабын!
Улуу Итэҕэл,
Өбүгэм үөрэҕэ
Мин хааммар тыгыалыыр,
Мин тыыммар иһиллэр!
Бэйэбин дьэ булан уоскуйдум,
Махтанным мин
Үрдүк Айыыларбар
Сүдү өбүгэлэрбэр!
Светлана Горохова – Харысхаана, Хотугу Саха