Бүгүн, Саха Өрөспүүбүлүкэтин Бырабыыталастыбатын дьиэтигэр Иитээччи күнүн иитинэн «Лучший сельский детский сад» өрөспүүбүлүкэтээҕи күрэс кыайыылаахтарын эҕэрдэлээтилэр.
Манна барыта 24 улуустан 34 уһуйаан кыттыыны ылбыт. Түмүккэ 7 уһуйааҥҥа Муҥутуур Кыайыылаах аат иҥэрилиннэ уонна түөрт номинация ааттанна. Бу, үрдүк таһымнаах куонкуруска биһиги «Хаарчаана» уһуйааммыт Муҥутуур Кыайыылаах ааты ситистэ.
«Муҥутуур Кыайыылаахтар ааттарыгар киирии биһиэхэ улахан үөрүү, дьоһун ситиһии, үрдүк эппиэтинэс буолар. Биһиги уһуйааммытыгар оскуола иннинээҕи саастаах оҕону иитии олох тэтимин кытта тэҥҥэ, сөптөөхтүк барарын ситиһээри төрүт үгэстэри, култуураны иҥэриигэ аныгы кирбиилэр ньымаларын туттабыт. Маны тэҥэ, араас бырайыактардаахпыт. Түгэнинэн туһанан, бука бары иитээччилэри уонна уһуйаамыт бары үлэһиттэрин дьоһун кыайыыбытынан эҕэрдэлиибин уонна махтанабын! Бу үрдүк аат – биһиги бука бары түмсүүлээх уонна айымньылаах үлэбит түмүгэ буолар», — диэн сэбиэдиссэй Марина Верховская үөрүүтүн үллэһиннэ.
Ксения Горохова