Саха сиригэр Национальнай бэчээт күнэ сылын аайы от ыйын 1 күнүгэр бэлиэтэнэр. Бу сырдык уонна суолталаах бырааһынньык 2020 сыллаахха Ил Дархан Айсен Николаев ыйааҕынан олохтоммута. Мин бүгүҥҥү суруйуубун өрөспүүбүлүкэ саамай ыраах бүгэн сытар Эбээн – Бытантай улууһун “Бытантай уоттара” сахалыы тыллаах олохтоох хаһыаппыт үлэтигэр – хамнаһыгар туһаайабын.
Бүгүҥҥү күҥҥэ дойду үрдүнэн ыарахан кэм тирээбитин ким да мэлдьэспэт, үөскээбит балаһыанньа норуот куолаһын былааска тиэрдэр, былаас үлэтин норуокка сырдатар, “Норуот – былаас” диэн хардарыта сибээһи олохтуур иһитиннэрэр – биллэрэр сириэстибэлэр үлэлэригэр – хамнастарыгар эмиэ билиннэ. Биһиги 200 тиражтаах хаһыаппыт биир сылга аҥардас коммунальнай өҥөҕө төлөбүрэ 2,5 мөл. солк. тэҥнэһэр. Онон, эрэдээксийэ үлэһиттэрэ коммунальнай өҥөҕө ороскуоту аччатар туһуттан бары биир хоско көһөргө күһэлиннилэр. Кистэл буолбатах, хаһыат, кинигэ бэчээттээн таһаарар тэриллэр эргэрэн туһаттан тахсан эрэллэр. Үлэҕэ – хамнаска туттуллар үгүс аныгы тэрил тиийбэт, бэл көннөрү фотоаппарат суох, барыта эргэрдэ диэн үлэһиттэр муҥатыйаллар.
Редакция билигин үлэлии – хамсыы олорор дьиэтин 2014 сыллаахха оччотооҕу хаһыат эрэдээктэр – дириэктэрэ Н.Р. Попова тупсаҕай көстүүлээх гына туттаран үлэҕэ киллэрбитэ. Оттон билигин үлэлии турар хаһыат уонна кинигэ бэчээттиир оборудованиялары 2015 с. аҕалтарбыта.
Аны хаһыат үлэтин туһунан сырдатар буоллахха маннык:
- 2013 с. биһиги хаһыаппыт Саха Өрөспүүбүлүкэтин Бырабыыталыстыбатын Гранын ылары ситиспитэ;
- 2019 с. хаһыат “Улусмедиа” сайтка бэриниилээх үлэтин иһин анал дипломунан бэлиэтэммитэ;
- 2020 с. “Сахабэчээт» иһинэн ыытыллар “Сыл таһаарааччыта” диэн куонкуруска дипломант аатын сүкпүтэ;
- 2023 с. “Медиа – лидер” диэн оройуоннардааҕы хаһыаттар редакцияларын уонна электроннай ситиминэн таһаарыылар истэринэн ыытыллыбыт профессиональнай таһымнаах куонкуруска арктическай группалар истэринэн Гран-при үрдүк ааты ылары ситиспитэ;
- 2025 с. “Полиграфист года” диэн куонкуруска хаһыат дипломант буолбута;
- 2025 с. түмүгүнэн биһиги хаһыаппыт “Саамай баай ис хоһоонноох хаһыат” диэн түһүмэххэ кыайыылаах тахсыбыта.
Маны таһынан араас сылларга үтүө түмүктээх үлэтин иһин бэрт элбэх араас дипломнарынан, өйдөбүнньүк бэлиэлэринэн наҕараадаламмыта.
Ханнык да хаһыат үлэтэ – хамнаһа кини үлэлиир кэлэктиибиттэн уонна салайааччытыттан быһаччы тутулуктаах. Бүгүҥҥү күҥҥэ манна бэрт аҕыйах киһилээх эрээри, олус иллээх кэлэктиип үлэлии-хамсыы олорор. Кинилэр үлэлэрэ эмиэ кэмигэр Бырабыыталыстыба да, «Сахабэчээт» да салалтатын өттүттэн болҕомтоҕо ылыллан бэлиэтэнэн иһэр. Бу аҕыйах айар дьонноох кэлэктиип ситиһиилэрэ үгүс сыраттан, элбэх үлэттэн тахсара биллэр.
Онтон мин «Бытантай уоттара» хаһыаты кытта уопсастыбаннай көмөлөһөөччү-кэрэспэндьиэн быһыытынан үлэлэспитим быйыл 5 сылын туолла. Онон, түгэнинэн туһанан, күндү дьоммун Саха бэчээтин күнүнэн итиитик-истиҥник эҕэрдэлиибин! Ааттыын да Айар дьиэбит аана сабыллыбатын, сахалыы тыллаах, кэрэ эйгэлээх «Бытантай уоттара” хаһыаппыт сырдык санааны бар дьоҥҥо саҕа, үтүөҕэ-кэрэҕэ угуйа туруохтун диэн тылларынан бу суруйуубун түмүктүүбүн.
Светлана Горохова – Харысхаана, хаһыат уопсастыбаннай кэрэспэндьиэнэ уонна эрэллээх ааҕааччыта
Хаартыскалар эрэдээксийэ архыыбыттан туһанылыннылар