Эмп үлэһиттэрин күнэ сылын ахсын бэс ыйын үһүс баскыһыанньатыгар бэлиэтэнэр. К.А. Серебрякова аатынан улуустааҕы киин балыыһа үлэһиттэрэ үтүө үгэс быһыытынан идэлээх күннэрин айылҕаҕа тахсан бэлиэтээтилэр.
«2026 — Арассыыйаҕа норуоттар сомоҕолоһууларын сыла буоларынан эмп үлэһиттэрэ идэлээх күммүтүн норуоттар доҕордоһууларын тиэмэтигэр туһулаан ыыттыбыт. Балыыһабыт отделениеларынан арахсан ырыа-үҥкүү куонкуруһун ыыттыбыт, сэргэх күрэхтэргэ оонньоотубут, сүүйүүлээх лотерея оонньоттубут.
Бэлиэ күммүтүгэр олохтоох дьаһалта баһылыга Сергей Аликов ыалдьыттаан, итиитик-истиҥник эҕэрдэлээн туран, “Түгэһиир нэһилиэгин бочуоттаах олохтооҕо» үрдүк ааты биһиги кэллиэгэлэрбитигэр – клиническай лабораҥҥа Сардаана Дмитриевна Гороховаҕа, учаастактааҕы медсиэстирэҕэ Акулина Афанасьевна Слепцоваҕа туттарбыта олус долгутуулаах, үөрүүлээх түгэн буолла.
Маны тэҥэ быйыл «СӨ Доруобуйа харыстабылын туйгуна” үрдүк наҕарааданы улуустааҕы киин балыыһа кылаабынай бырааһа Георгий Викторович Бочкарев ылыаҕын ылла!
Түгэнинэн туһанан, биир идэлээхтэрбин, бүгүн үлэ үѳhүгэр сылдьар кэллиэгэлэрбин уонна оройуон доруобуйатын харыстабылыгар кылааттарын киллэрсибит бары бэтэрээннэри ааспыт бырааһынньыкпытынан итиитик-истиҥник эҕэрдэлиибин! Эhигини мэлдьи кытаанах доруобуйа, дьон махтала арыаллаатын, күүскүтүгэр күүс, эрчимҥитигэр эрчим эптин-кынаттаатын!” – диэн биир идэлээхтэр союзтарын бастакы тэрилтэтин (профсоюз) салайааччыта, рентген-лаборант идэлээх Алексан Аммосов кэпсээтэ.
Аныгы кэмҥэ мэдиссиинэ бары хайысханан балысханнык сайынна диэн бэлиэтиир тоҕоостоох. Кытыы сытар уһук хоту улуустар олохтоохторо аныгы үйэ араас тэрилинэн доруобуйаларын туругун чинчийэн, ыарыыны эрдэттэн сэрэтэр кыахтаннылар. Куһаҕан суоллаах-иистээх нэһилиэктэри быраастар мобильнай биригээдэлэрэ кэрийэн, дьон миэстэтигэр көрдөрүнэрэ олус табыгастааҕын бэлиэтииллэр.
Биһиги улууспутугар 3 мэдиссиинэ тэрилтэтэ баар: улуус киинигэр Саккырыырга киин балыыһа, Кустуурга врачебнай амбулатория, Дьарҕаалаахха фельдшерскай-акушерскай пуун. Билигин К.А. Серебрякова аатынан киин балыыһаҕа ыстаатынан 62 киһи үлэлиир. Бу иһигэр 9 быраас, 30 орто мэдииссинэ персонала баар. Кустуурга биир учаастактааҕы бырааһы кытары фельдшер, медицинскэй уонна процедурнай сиэстирэлэр, акушерка, Дьарҕаалаахха биир фельдшери кытары санитарка үлэлииллэр.
Сардаана Копырина