Бу күннэргэ Саха Судаарыстыбаннай Эстрада тыйаатырын солиһа, чаҕылхай сулуспут, уолбут Михаил Рожин -Оталан буруолуу сылдьар саҥа ырыата куйаар ситимин нөҥүө ньиргийэ тарҕанан истээччи сэҥээриитин ылыаҕын ылла. Ырыаны хайдах, ким айда?
Бу туһунан Михаил биһиэхэ төлөпүөн нөҥүө санаатын үллэһиннэ.
- Дойдубун олус таптыыбын! Ханна да сырыттарбын, мин -Эбээнбытантайбын дэнэбин. Хоту сир тыйыс усулуобуйатыгар олорор, үлэлиир – хамсыыр биир дойдулаахтарым олус көрсүө-сэмэй дьон буолаллар. Туохтан да толлубат, кыраҕа кыһарыйтарбат, тулуурдаах, дьулуурдаах дьонноох мин төрөөбүт дойдум – Эбээн Бытантайбынан киэн туттабын! Бу ырыабын төрөөбүт дойдубар, дьоммор-сэргэбэр аныыбын.
Диэн Михаил куруутун буоларын курдук үөрэн-көтөн, этэн – тыынан кэпсээтэ.
Ырыа куттаах, хатыламмат куоластаах Мишабыт хас биирдии ырыата хит буолар диэтэхпинэ сыыспаппын. Кырдьык, сахаҕа дьэ чахчы күүстээх, дэҥ куоластаах биһиги уолбут — Оталан. Айылҕаттан бэриллибит айдарыытын идэ оҥостон Мишабыт Саха сиригэр эрэ буолбатах, араас таһымнаах куонкурустарга кыайар-хотор, үгүс ситиһиилэнэрин биир дойдулаахтара олус диэн астына, сэргии кэтиибит. Бу сайын Михаил икки улахан куонкуруска өрөспүүбүлүкэни көмүскүү кыттаары бэлэмнэнэ сылдьарын туһунан эстрада тыйаатырын сайтыгар суруйаллар. Ол курдук, Долун Ушницкий бэс ыйын 12 күнүгэр , оруобуна дойдубут сүрүн судаарыстыбаннай бырааһынньыгар — Арассыыйа күнүгэр Пятигорск куоракка «Россия” патриотическай ырыа бэстибээл – куонкурусугар, онтон бэс ыйын 17-20 күннэригэр аан дойду таһымнаах “Солдатский конверт” бэстибээл-куонкуруска Сахабыт сирин ааттатыаҕа, көмүскүөҕэ. Бу куонкуруска кини Сергей Прачев тылларыгар уонна эстрада тыйаатырын хормейстера Наталья Стручкова дьүрүлүгэр “Россия” ырыаны толоруоҕа. Уолбутугар сүрдээх улахан эппиэтинэс сүктэриллэр, бүтүн дойду уонна аан дойду таһымнаах куонкурустарга өрөспүүбүлүкэ чиэһин көмүскүүр. Михаилга эдэрдии эрчими, кыайыыны-хотууну, чэгиэн туругу баҕарабыт! Биир дойдулаахтарыҥ эйиэхэ өйөбүл, күүс-сэниэ мэлдьи буолаллар.
# хотусирэндьонуҥ
Яна РОЖИНА