Саха сиригэр Аартыка күнүн иитинэн өрөспүүбүлүкэбит киин куоратыгар «Мир Арктики” VIII эрэгийиэннэр икки ардыларынааҕы быыстапка-дьаарбаҥка буолла. Бу улахан тэрээһиҥҥэ биһиги улууспут уран тарбахтаах маастардара үрдүк ситиһии көтөллөннүлэр!
Ол курдук, 2024 сыллаахтан иис абылаҥыгар ылларан утумнаахтык дьарыктанан саҕалаабыт биир дойдулаахпыт Мария Аммосова бу маннык улахан тэрээһиҥҥэ аан маҥнай кыттан, «Муусука төрүт тэриллэрэ” номинация дипломана буолла. Өссө да үүнэн-сайдан ис, ситиһиилэр кэлэ турдуннар!
Айар-тутар эйгэҕэ чиҥник үктэммит, СӨ норуотун маастара Ньургуйаана Колесова «Традиционный национальный костюм северных народов” номинацияҕа Кыайыылаах үрдүк аатын ылла! Эмиэ бу хайысхаҕа талба талааннаах Ольга Попова 3 миэстэни ситистэ. Уран тарбахтаах биир дойдулаахпыт Элина Гузаирова «Изделия из меха и кожи» номинацияҕа 2 миэстэни ылыаҕын ылла. “Традиционный кисет” номинацияҕа Елена Васильева дипломант буолла. Оннук гынан биһиги улууспут аатыттан кыттыбыт биэс маастар бэһиэн ситиһиилэнэн, киэҥ туонаҕа төрөөбүт Эбээн-Бытантайбыт аатын ааттаттылар!
“Өрөспүүбүлүкэтээҕи «Якутия мастеровая” уонна «Мир Арктики» эрэгийиэннэр икки ардыларынааҕы быыстапка-дьаарбаҥкалар сылын ыытыллар улахан таһымнаах тэрээһиннэр. Манна хоту улуустар маастардарын үлэлэрэ көстөр, үүнэллэригэр-сайдалларыгар, айалларыгар-туталларыгар, сыал-сорук оҥостоллоругар төһүү күүс буолар. Бу быыстапкаларга кыттан номинация ыллаххына — улахан чиэс, миэстэлэстэххинэ олох үчүгэй көрдөрүү буолар. Күрэҕи сыаналыыр хамыыһыйа састаабыгар научнай үлэһиттэр, үрдүк таһымнаах дьоннор киирэллэр. Миэстэлэспит үлэлэр бу сылы быһа араас норуоттар икки ардыларынааҕы, Бүтүн Арассыыйатааҕы быыстапкаларга кыттар чиэскэ тиксэллэр. Ол курдук муус устар ыйга Ньургуйаана Колесова, Ольга Попова уонна мин үлэлэрим Москуба куоракка Бүтүн Арассыыйатааҕы быыстапкаҕа кытта барыахтаахтар. Ону таһынан өрөспүүбүлүкэбит иһигэр элбэх быыстапкалар сыл устата ыытыллыахтара.
Манан мин эдэр ыччаттарга туһаайан этиэхпин баҕарабын, СӨ уус-уран оҥоһуктарын маастара, онтон үрдээн СӨ норуотун маастара буоларга элбэхтик өрөспүүбүлүкэтээҕи быыстапкаларга кыттан, үгэс буолбут матырыйаалларынан үчүгэй оҥоһуктары оҥорон, үрдүк көрдөрүүлэниэххин наада. Биһиги улууспутугар талааннаах уус дьоннор элбэхтэрэ буолуо дии саныыбын, ким быыстапкаларга кыттыан баҕарар биһигиттэн сүбэлэтиҥ, Дьокуускай куоракка кытыннарыаххытын баҕарар буоллаххытына билсиҥ, көмөлөһүөхпүтүн сөп.
Түгэнинэн туһанан, СӨ уус-уран оҥоһуктарын маастардарыгар, эдьиийдэрбэр Елена Романовна Колесоваҕа, Тамара Дмитриевна Гороховаҕа көмөлөрүн, сүбэлэрин иһин махталбын тириэрдэбин,» — диэн Элина Гузаирова санаатын үллэһиннэ.
«Үс күннээх быыстапка-дьаарбаҥка түмүгүнэн биһиги, эбээн бытантайдар, үгүс ситиһиилэнэн инники күөҥҥэ таҕыстыбыт. Дьон-сэргэ астынна аҕай, дьарбаҥкаҕа туруорбут оҥоһуктарбыттан кэрэ куоларга аналлаах этно истииллээх киэргэллэрин хамаҕатык ыллылар, эбиитин оскуола оҕолоругар төрүт музыкальнай тэриллэргэ сакаас бөҕө ылллым,» — диэн Мария Ивановна үөрүүтүн үллэһиннэ.
Сардаана Копырина