Эбээн Бытантай олохтоохторугар бэрт сэргэх нэдиэлэ ааста

Эдэрдиин эмэнниин, “Гарпан” этнокултуурунай кииҥҥэ тоҕуоруһа түстүлэр. Бу күҥҥэ биир бөһүөлэккэ олорон эрэ көрсүбэккэ сылдьыбыт дьүөгэлиилэр, үөлээннээхтэр көрсөннөр ирэ-хоро кэпсэтэн, дуоһуйа сынньанан, дууһалыын чэпчээн аастылар.

Бу үлүгэр туох буолбутуй диэн, үксүгүт сэҥээрэ түспүт буоллаххытына, биһиэхэ Иннокентий Луковцев салайааччылаах айанныы сылдьар бөлөх артыыстара кэлэн «Сайылык», «Таптаа миигин» диэн сүрдээх үчүгэй, сэргэх испиктээктэри кэлэн көрдөрдүлэр.

Артыыстарбыт Дьааҥы улууһун бары нэһилиэктэрин кэрийэн, айаннаан кэлбиттэр.  Бары сылдьа үөрүйэх дьон буолан, сорохторо кулуупка, аҥардара Айар дьиэҕэ түһэн тып-тап  курдук утуйар, аһыыр сирдэрин оҥостон, нэдиэлэ курдук ыалдьыттаатылар.

Түгэни мүччү туппакка, кинилэр сырыыларын туһунан сиһилии салайааччыларын Иннокентий Луковцевы кытта кэпсэттибит.

—  “Мин Иннокентий Луковцев диэммин, Саха тыйаатырын артыыһа буолабын, билигин бу айанныы сылдьар бөлөх салайааччыта буолабын. Биһиги Эбээн Бытантай улууһугар кулун тутар 19 чыыһылатыгар Баатаҕайтан айаннаан кэлбиппит, маннааҕы олохтоох Слава уонна Алексей диэн, уолаттар массыыналарынан.  Биһиэхэ бастаан Раиса Дмитриевна тахса сылдьыбыта, онтон улуус сөбүлэҥин түһэрсэннэр манна кэллэхпит. Баһылык Иннокентий Николаевич өйөөн, култуура салалтатын салайааччыта Степан Степанович күүстээх көмөтүнэн маннык кэлэн бардыбыт. Түһэр сирбитин, аспытын, утуйар таҥаспытын барытын култуура үлэһиттэрэ олус үчүгэйдик бэлэмнээн атаардылар. Өссө Саккырыыр үрэҕэр, скалаҕа бураанынан илдьэннэр,  боруоста таҥас уларытта-уларытта хаартыска түстүбүт, ролик уһуллубут.

Нэһилиэк баһылыктара Роберт Афанасьевич, Лев Вячеславович айаммытыгар массыына биэрэн,  нэһиэлиэктэригэр аһатан-сиэтэн, олус үчүгэйдик көрсүбүттэригэр улахан махталбытын тиэрдэбит.

20-21 чыыһылаларга Саккырыырга икки испиктээктэрбитин көрдөрдүбүт, Семен Ермолаев- Сиэн Өкөр «Сайылык” диэн киинэ сценарыйынан суруллубут испиктээги Сергей Потапов туруорбута, ону көрдөрдүбүт уонна иккис күн Валентин Красновор суруйуутугар  Лена Тимофеева тылбааһыгар, режиссер Сюзанна Оржак туруоруутугар “Таптаа миигин, таптаа” диэн.

Кустуурга кулууп салайааччыта Розалия Николаевна, үлэһиттэр, эбээлэр буолан наһаа үчүгэйдик киирээппитин алҕаан, сыт таһааран, сандалы остуолларын тарданнар аһатан –сиэтэн, ыалларынан хоннорон, Бытантай үрэхтэригэр киирэн хаартыска түһэн, олус үчүгэйдик көрсөн атаардылар.

Дьарҕаалаахха салайааччы Татьяна Петровна эмиэ сүрдээх үчүгэйдик көрүстүлэр.

Эбээн Бытантай улууһа төһө даҕаны, үс эрэ нэһилиэктээҕин үрдүнэн дьоно-сэргэтэ көхтөөҕүн көрдөрдө, диэхпин баҕарабын.

Айаммыт олох, кэлэрбит-барарбыт устата наһаа үчүгэйдик табыллынна, сырдык-ыраас суолбут барытыгар аһаҕас буолла. Кустууртан, Дьарҕаалаахтан кэлэн истэхпитинэ дьүкээбил оонньоото, онон олус табыллан, үчүгэй сырыылаах сырыттыбыт.

Бу сылдьар бөлөхпүт тэттик — 10 киһилээх, онтон 9 артыыс уонна биир уоппутун-күөспүтүн биэрэр исписэлииспит.

Олус үчүгэйдик көрсүбүт ыалдьытымсах нэһилиэнньэлээх улууска улахан махталбытын тиэрдэбит. Сайда, үүнэ туруҥ диэн, баҕа санаабытын тиэрдэбит.”

Бу курдук Аартыка оройуоннарыгар артыыстар кэлэн сэргэхситэн бараллара олус кэрэхсибиллээх. Испиктээк көрөн сэргэхсийбит дьон, аны ырыаһыттар кэлэллэрин эрэнэ күүтэбит.

 

Марианна СЛЕПЦОВА