Бүгүн, ахсынньы 12 күнүгэр, култуура киинигэр РФ Конституциятын, итиэннэ Аҕа дойду Дьоруойдарын күнүгэр анаммыт сүрдээх долгутуулаах тэрээһин буолан ааста. Тэрээһини социальнай харалта управленията, киин бибилэтиэкэ уонна «Гарпан” ЭКК кыттыһан ыыттылар.
Бэлиэ күн бастакы чааһыгар кулууп дьиэтигэр мустубут дьону РФ Конституциятын күнүнэн Түгэһиир нэһилиэгин баһылыгын солбуйааччыта Дмитрий Сыроватский итиитик-истиҥник эҕэрдэлээтэ уонна үөрүүлээх быһыыга-майгыга 14 саастарын туолбут оҕолорго РФ гражданиннара буолалларын туоһулуур сүрүн докумуоннарын – пааспардары туттарда.
Тэрээһин иккис чааһыгар Аҕа дойду Дьоруойдарын күнүгэр анаммыт Саккырыыр орто оскуолатын үөрэнээччилэригэр “Эр санаа уруога” ыытылынна. Уруок Түгэһиир нэһилиэгиттэн ыҥырыллан уонна баҕа санаа өттүнэн быстах дьайыыга баран ийэ дойдуларын туһугар олохторун толук уурбут уолаттарбытыгар ананна. Оҕолорго анал байыаннай дьайыы сыалын-соругун сөптөөх ньыманан билиһиннэрдилэр, уолаттар тустарынан кэпсээтилэр, презентация оҥорон көрдөрдүлэр. Олохтоох поэт Михаил Колесов уонна 6 “а” кылаас үөрэнээччилэрэ сэрии тиэмэтигэр хоһоон аахтылар. Оҕолор уонна ыалдьыттар Щерзот Рябчиков толоруутугар “Саха уола” диэн ырыаны биһирии иһиттилэр.
Түмүгэр дьоруой уолаттарбыт туһунан видеоролигы оҕолор долгуйа, чуумпуран атахтарыгар туран иһиттилэр-көрдүлэр.
Бэлиэ тэрээһиннэр тустарынан улуустааҕы социальнай харалта сырдатта.