Сахабыт сирин киин куоратыгар Дьокуускайга бүгүн ыытыллар өрөспүүбүлүкэтээҕи сүлүөккэ биһиги улууспутуттан 10 чулуу табаһыт кыттыыны ылаллар. Урукку сылларга биһиги улууспут хотугу хоһууттара эрэгийиэн, дойду, өрөспүүбүлүкэ таһымнаах съезтэр чэрчилэринэн ыытыллыбыт табаһыттар Оонньууларын чөмпүйүөннэрин үрдүк аатын үс төгүл ылан тураллар. Бу да сырыыга урукку таһыммытыттан түспэккэ хамаандабыт ситиһии көтөллөнүө диэн бигэ эрэнэбит.
Санатан эттэххэ, 2005 сыллаахха биһиги улууспут хамаандата Табаһыттар өрөспүүбүлүкэтээҕи оонньууларыгар Саха Өрөспүүбүлүкэтин чөмпүйүөннэрэ үрдүк ааты сүкпүттэрэ уонна «Урал-вахтовка” хаһаайыннара буолбуттара.
2013 сыллаахха таба салаатын биллиилээх үлэһитэ И.К.Спиридонов 100 сааһыгар анаммыт өрөспүүбүлүкэтээҕи сүлүөккэ, улууска тыа хаһаайыстыбатын сайдыытыгар дьоһун суолун хаалларбыт, үгүс кылаатын киллэрбит А.Д.Бочкарев эдэр табаһыттар хамаандаларын тэрийэн илдьибитэ. Бу улахан тэрээһиҥҥэ өрөспүүбүлүкэбит оройуоннарыттан уопсайа 300 табаһыт мустан, сыарҕалаах табанан, уучаҕынан сүүрдүүгэ, наартаны ойууга, маамыктаны быраҕыыга, булт хайыһарынан сүүрүүгэ, сыалы ытыыга уо.д.а. күрэхтэспиттэрэ. Бэл диэтэр, Норвегияттан «Аан дойду табаһыттара” ассосиация бэрэстэбиитэллэрэ, ыаллыы эрэгийиэннэр тыа хаһаайыстыбатын миниистирдэрэ ыалдьыттаабыттара. Уопсайа 140 кэриҥэ таба Дьокуускай туонатыгар мустубута.
Биһиги улууспутуттан 10 табалаах барбыт дьоммут, 19 хамаанданы кэннилэригэр хаалларан, Аан дойду чөмпүйүөннэрэ үрдүк ааты сүгэн, өтөрүнэн буолбатах кыайыыны – хотууну ситиспиттэрэ, «Урал – вахтовка” массыына, буран тиэхиньикэлэр сыаналаах бириистэрдээх үөрүү көтөллөөх кэлбиттэрэ.
Биирдиилээн күрэххэ комбинированнай эстафетаҕа биир дойдулаахпыт Афанасий Константинов чаҕылхай кыайыыны ситиһэн, «Буран” бирииһи туппута.
Онтон 2017 сыллаахха табаһыттар Бүтүн Арассыыйатааҕы IV сийиэстэрин чэрчитинэн спорт хотугу көрүҥнэригэр өрөспүүбүлүкэтээҕи уонна эрэгийиэннээҕи күрэхтэһиилэр буолбуттара. Ямало-ненецкэй автономнай уокуруктан, Мурманскай уобаластан уо.д.а. бу улахан тэрээһини көрө кэлбиттэрэ. Уопсайа 28 хамаанда, 300 кэриҥэ кыттааччы Күөх Хонууга мустубута. Эрэгийиэн таһымыгар Саха сирин биһиги улууспут уонна Томпо улуустарын хамаандалара көмүскээбиттэрэ. Манна 12 таба уонна 6 табаһыт эмиэ көтөр аалынан өрөспүүбүлүкэ киинигэр тиийбиттэрэ. Эбээн Бытантай хамаандата бу улахан таһымнаах күрэхтэһиигэ I бочуоттаах миэстэни ситиһэн, кыайыы өрөгөйүн билбитэ, Арассыыйа чөмпүйүөннэрэ үрдүк ааты ылбыта, «Уаз-фургон” сүрүн бириис хаһаайына буолбуттара.
Нарыйа Слепцова сыарҕалаах табанан, уучаҕынан сүүрдүүгэ тэҥнээҕин булбатаҕа. Эбээн-Бытантай табалара саамай түргэннэр, сүүрдээччилэрэ чаҕылхайдар диэн өрөспүүбүлүкэни эрэ буолбакка, дойдубут үрдүнэн ааппыт-суолбут сураҕырбыта.
Сардаана Копырина