Түгэһиир нэһилиэгэр сылын аайы ыытыллар үтүө үгэскэ кубулуйбут “Хаарчаана” оҕо уһуйаанын иһинэн “Быйаҥ” ас-үөл дьаарбаҥката ыытылынна.
Быйылгы тэрээһин күн-дьыл туругунан таһырдьа буолбакка, “Гарпан” этнокултуурунай киин иһигэр буолла. Оҕо уһуйаанын бары бөлөхтөрө төрөппүттэр көмөлөрүнэн “ох” курдук оҥостон, сандалы хотойорунан ас эгэлгэтин тардан кэбистилэр. Күн көрүөх ас арааһа тахсан, сатабыллаах хаһаайкалар фантазияларын киһи эрэ кэрэхсии көрдө. Ол быыһынан уһуйаан бөлөхтөрүн иһигэр араас күрэхтэр ыытыллан, ырыа-үҥкүү, көр-нар оройуттан тутулунна.
Атыы-эргиэн дьаарбаҥкатын чэрчитинэн ыытыллыбыт күрэхтэри уһуйаан үлэһиттэрэ Фаина Колесова, Мария Никитина, Екатерина Николаева сыаналаатылар. Ол курдук түмүктэр маннык буоллулар:
“Күһүҥҥү айылҕа матырыйаалынан бастыҥ композия» — “Тугутчаан” кыра бөлөх;
“Атыы-эргиэн миэстэтин бастыҥ киэргэтии” – “Чуораанчык” бэлэмнэнии бөлөх;
“Дьаарбаҥкаҕа дьону-сэргэни ыҥырыыга бастыҥнар» — «Туллукчаан” орто бөлөх;
“Баай-талым сандалы” – «Нөлтэнкэ» улахан бөлөх;
«Бастыҥ минньигэс выпечка» — «Сулусчаан» эрдэтээҥҥи кыра бөлөх;
«Куонкурус үлэтин бастыҥ билиһиннэрии» — “Күнчээн” эрдэтээҥҥи кыра бөлөх;
“Көрөөччү биһирэбилэ» — «Кустук» бэлэмнэнии бөлөх;
“Овощной богатырь” саамай улахан оҕуруот аһа – Артур Горохов, «Күнчээн» эрдэтээҥҥи кыра бөлөх;
«Чудеса природы» дьикти кээмэйдээх, быһыылаах оҕуруот аһа – Афоня Степанов, «Чуораанчык” бэлэмнэнии бөлөх.
Сити курдук, быйаҥнаах дьаарбаҥка түмүктэнэн, киирбит үп-харчы кэнчээри кэскиллэрбит, кырачаан оҕолорбут иккис дьиэлэрэ буолбут уһуйааннарын бөлөхтөрүгэр бэриллэн, үүнэр-сайдар усулуобуйаларын тупсарыыга ананыаҕа.
Сардаана Копырина