Бэстибээлгэ култуура салалтатын салайааччыта Степан Слепцов уонна «Гарпан» этнокултуурунай киин үлэһиттэрэ кытталлар.
— Бэстибээл наһаа үрдүк таһымнаах, дойдубут араас эрэгийиэннэриттэн кыттааччы элбэх кэлбит. Саха сириттэн Дьокуускай, Нерюнгри, Алдан куораттартан, Эдьигээн, Муома, Аллайыаха, Кэбээйи, Бүлүү, Аллараа Халыма уонна биһиги улуустан уопсайа 117 киһилээх дэлэгээссийэ кэлэн кытта сылдьабыт.
“Саха” НКИХ «Геван”, “Илкэн” сурунаал эрэдээксийэлэрэ кэлэн үлэлии сылдьаллар. Бэстибээл сүрдээх киэҥ бырагыраамалаах. Ол курдук, Арассыыйаҕа төрүт аҕыйах ахсааннаах норуоттар бырааптарыгар болномуочунайдарын, Хоту сир дьахталларын форумнара, хоту сир суруйааччылара туһунан араас былаһааккаларга үлэлииллэр.
Биһиги Саха сирин экспозициятын быыстапкатыгар үлэлээтибит. Манна сүрдээх элбэх, хотугулуу тыыннаах, чаҕылхай үлэлэр тураннар кэрэхсэннилэр. Биир дойдулаахтарбыт Туйаара Колесова тирии, сарыы таҥастара, оҥоһуктара, Мария Аммосова таба уҥуохтарыттан оҥоһуктара, Элина Гузаирова таба, чубуку тириититтэн оҥоһуктара, Ольга Попова саҥа оҕуруо, сарыы оҥоһуктара үрдүк сэҥээриини ыллылар. Маны сэргэ, «Кочевье Севера” күрэххэ 4 номинацияҕа “Гарпан” ЭКК үлэһиттэрэ кыттыахтара. Бастакы күн, дьоммут сольнай ырыалара бары киирэн хааланнар, биир номинация түмүктэннэ. Дьонум бары дьоһуннык кытыннылар, диэн сыаналыыбын. Өссө даҕаны бөлөҕүнэн ырыа толоруута, театральнай туроруу, народнай үҥкүү номинацияларбыт хааллылар. Бэстибээл ыам ыйын 2 күнүгэр түмүктэнэр.