Эбээн-Бытантай улууһугар «Родные. Любимые» дьиэ кэргэн холбоһуктарын форумун муниципальнай түһүмэҕин үөрүүлээх арыллыыта буолла.
Дьиэ кэргэттэри көҕүлүүр сыаллаах тэрээһин «Бастакылар хамсааһыннара» иитинэн иккис төгүлүн ыытылынна.
Улуус дьаһалтатын социальнай боппуруостарга салайааччыта Мария Ефимова бары мустубут дьону эҕэрдэлээн туран, форуму арыллыбытынан биллэрдэ.
Салгыы 15 сыл устата алаһа дьиэ тэринэн, аал уоту оттунан, эйэ-дэмнээхтик, сарын-сарынтан өйөнсөн, бэйэ-бэйэлэрин ситэрсэн, ыал буолан олорор элбэх оҕолоох эдэр дьиэ кэргэҥҥэ – Дария, Егор Ефимовтарга уонна ийэ, аҕа үрдүк аатын сүгэн, кэрэ-мааны кыыс оҕоломмут Анита, Петр Потаповтарга улуус баһылыгын Иннокентий Стручков эҕэрдэ суругун үөрүүлээх быһыыга-майгыга туттардылар. 
Түгэһиир нэһилиэгин дьаһалтатын баһылыга Сергей Аликов «Родные. Любимые” форум дьиэ кэргэттэргэ, уопсастыба сайдыытыгар улахан суолталааҕын, кэнчээри ыччаттарга элбэх кыаҕы арыйарын туһунан тоһоҕолоон эттэ.
«Бастакылар хамсааһыннарын” иитинэн “Мы — граждане России” Бүтүн Арассыыйатааҕы бырайыак чэрчитинэн Саккырыыр орто оскуолатын үөрэнээччилэригэр Анабель Алексееваҕа, Айтал Слепцовка дохсун ытыс тыаһын доҕуһуолугар бастакы дьоһун докумуоннары — пааспардары туттарыы үөрүүлээх быһыыга-майгыга ыытылынна.
Улууспутугар «Бастакылар хамсааһыннарын” үлэтин сүрүннүүр Екатерина Николаева бу хамсааһын биһиэхэ 2 сылын ситиһиилээхтик үлэлиирин, кыттыылаахтар ахсааннара элбиирин туһунан эттэ. Төһө да уһук хотугу улууска олордорбут, дойдубутугар ыытыллар хамсааһыҥҥа кыттыһан, бырайыактарга кыттан өссө да сайдан иһэрбитигэр баҕа санаатын эттэ.
Форум үөрүүлээх чааһын түмүктэниитэ төрөппүт оҕотугар саамай сүрүн настаабынньык буоларын, барыта кэнчээри кэскил, оҕолорбут туһугар диэн кыттыылаахтар эппиттэрэ саамай оруннаах буолла.
Сардаана Копырина