Бүгүн, тохсунньу 22 күнүгэр, СӨ Ил Дархана Айсен Николаев төрөөбүт күнүн бэлиэтиир.
Өрөспүүбүлүкэ баһылыга төрөөбүт күнүгэр улуустары кэрийэр үтүө үгэстээх. Ол курдук, 6 сыл анараа өттүгэр, 2020 сыллаахха Ил Дархан төрөөбүт күнүн Эбээн-Бытантай улууһугар үлэтин сырыытынан кэлэ сылдьан көрсүбүтэ. Кини улууспут саамай аҕыйах нэһилиэнньэлээх Дьарҕаалаах нэһилиэгэр бөртөлүөтүнэн «Сайдыы» диэн пилотнай бырайыагынан тутуллубут, мас кыырпаҕынан оттуллар саҥа хочуолунайы көрбүтэ. Улуус киинигэр Р.И. Шадрин аатынан Саккырыыр орто оскуолатыгар, саха ынаҕын иитэр «Бытантай» генофонднай питомникка, тыыл бэтэрээнэ, үйэтин тухары таба иитиитигэр үлэлээбит Мария Николаевна Мироноваҕа ыалдьыттаабыта.
Салгыы улуус дьаһалтатын дьиэтигэр Эбээн-Бытантай улууһун социальнай-экэнэмиичэскэй сайдыытын тула улахан мунньах буолбута. Мунньах боротокуолун сүнньүнэн Ил Дархан анал дьаһала тахсан, дьон-сэргэ олоҕун уйгута тупсарыгар, инники сайдыыга тосхоллор ууруллубуттара.
