Бу дьыл балаҕан ыйын 22 күнүгэр Стручков Иннокентий Николаевич Эбээн -Бытантай улууһун баһылыгын дуоһунаһыгар киириитигэр Ил Дархан уонна Бырабыыталыстыба аатыттан Саха сиринээҕи Суол уонна транспорт миниистирин бастакы солбуйааччыта Анатолий Константинович Потапов кыттыыны ылбыта. Улууспут инники сайдыытыгар олус суолталаах суол оҥоруутун боппуруоһа сытыытык турарын Бырабыыталыстыбабыт уонна Ил Дархаммыт бэрткэ өйдөөн болҕомто уурбуттара киһини кэрэхситэр.
Анатолий Константиновиһы олус үлэһит, сатабыллаах салайааччы быһыытынан билэбит, истэбит. Кини бэйэтэ илэ хараҕынан көрөн билиҥҥи туругунан ыраах хоту улууспутугар суолбут туруга хайдаҕын исписэлиис быһыытынан сыанабыл оҥорбута чахчы. Дьиҥэ суол кутуллар матырыйаала үрдүттэн баар, үбэ-харчыта тыырылыннаҕына оҥоһуллар кыахтааҕын биллэҕэ. Ону сылааһына улууспут саҥа дьаһалтата, нэһилиэк баһылыктара анал бырагыраама оҥорон хотугу дойдубутугар тыын суолталаах суол тутуутун үбүлээһинин туруорсаллара бэрт этэ.
Өр сыл устата тутулла сатыыр Саккырыыр — Кустуур суола ситэриллэн, Саккырыыр — Дьарҕаалаах суола оҥоһуллара буоллар олох-дьаһах сайдарыгар, үлэ-хамнас таһаарыылаах буоларыгар олук буолуо этэ. Улууспутугар, өрөспүүбүлүкэбитигэр саха төрүт сүөһүтэ тарҕанарыгар, дьиҥ сахабыт сылгыта тыын ылан үөскээн тэнийэригэр, табабыт иитиитэ чөлүгэр түһэн, болҕомто ууруллан ахсаана элбииригэр, туризм курдук салаа тэриллэригэр, ас-үөл, таҥас-сап тиэллиитэ, олох сайдыыта суолтан быһаччы тутулуктааҕын бары билэн эрдэхпит.