И.Н. Слепцов аатынан Кустуур орто оскуолатыгар «Эр бэрдэ” күрэх буолла. Күрэххэ 6, 7, 8, 9, 10 кылаас уолаттара аҕаларын, убайдарын кытта кытыннылар.
Тэрээһин сыала-соруга:
— Чөл туруктаах буолуу, кэлэр кэнчээри ыччаты, инники кэскили сырдыкка- кэрэҕэ уһуйуу;
— Өбүгэ үгэһигэр кэрэхсэбиллэри иҥэрии;
— Төрөөбүт тылын, дойдутун туһунан билэрин ситиһии;
— Оҕо эт-хаан өттүнэн сайдыылаах буоларыгар дьулууру иитии;
— Оҕо иитиитигэр аҕа оруолун үрдэтии, уол оҕону сахалыы сиэргэ-майгыга иитии – уһуйуу;
Күрэх 6 түһүмэхтэн турда: бэйэни билиһиннэрии-3-5мүн., « Өркөн өй» викторина, айар дьоҕуру көрдөрүү (уол аҕатынаан, бэйэ оҥоһуга ирдэнэр), куһу үргээһин, сыалы ытыы, балык кыһыы.
Дьүүллүүр сүбэҕэ Мигалкин Андрей Ильич — нэһилиэк дьокутаата, оскуола үлэһитэ, Колесов Иннокентий Егорович – физкультура учуутала, Шадрина Тамара Васильевна — төрөппүт кэмитиэтэ, социальнай харалта үлэһитэ олордулар.
Бэйэни билиһиннэрии күрэҕэр бары сахалыы таҥнан бэйэлэрин уустаан-ураннаан сырдаттылар. Бииртэн биир эр бэрдэ сахалыы саҥаран, киһи эрэ истэ олоруох курдук кэпсээтилэр-ипсээтилэр. Өркөн өй түһүмэххэ өбүгэ үгэһэ, төрөөбүт дойдуларын устуоруйата, булт-алт үгэһэ, кыыл-сүөл суола ыйытыктар буоллулар. Бу түһүмэххэ өркөн өйүнэн Самойлов Саян, 7 кылаас үөрэнээччитэ аҕатыныын чорбойон таҕыстылар. 3 түһүмэх — айар дьоҕуру көрдөрүү. Манна дьиэлэригэр оҥорбут бэйэлэрин оҥоһуктарын аҕалан, киэҥ эйгэҕэ көрдөрөн кэпсээтилэр. Бары да олус талааннаахтарыттан сөрү диэн сөхтүбүт. Наумов Георгий, 6 кылаас үөрэнээччитэ Бытантай үрэх араас дьикти таастарын хомуйан олус үчүгэй композиция оҥорбуттарын кэпсээтилэр. Самойлов Саян аҕатыныын хоту дойду айылҕатын, мааны кыылын — тайаҕы уонна тугуту уотунан сиэтэн фанераҕа хартыына оҥорбуттарын сэргээтилэр. Слепцов Георгий убайынаан Боярскай Михаиллыын олус кэрэ тааһынан оҥорбут чубукуларын кэпсээтилэр. Слепцов Кирилл күтүөтүнээн Сыроватскай Владимирдыын таба сыарҕатын оҥорбуттарын, хайдах оҥоһулларын ымпыгар-чымпыгар тиийэ кэпсээтилэр. Онтон Старостин Алеша убайынаан Старостин Иннокентийдыын хайдах симэх манекенын оҥорбуттарын көрдөрдүлэр. Бу түһүмэх көрөөччүлэр интэриэстэрин тарта, оҕолорбут олус да талааннаахтар эбит диэн бэри диэн бэркиһээтибит, сөрү диэн сөхтүбүт. 4 түһүмэх — куһу үргээһин буолла. Манна ким түргэнник, ыраастык куһу үргээбит бастыыр. Бары да куһу кустуур уолаттар буолан аҕаларын, убайдарын кытта кустарын түргэн үлүгэрдик үргээн кэбистилэр. 5 түһүмэх — сыалы ытыы. Манна бэргэн ытааччы Кирилл Слепцов, 9 кылаас үөрэнээччитэ буолла. Бүтэһик түһүмэх – балыгы кыһыы, бу түһүмэххэ хоту дойду биир мааны балыгын — дьарҕааны кыстылар, ыалдьыттарга амсаттылар, күндүлээтилэр.
“Эр бэрдэ- 2026” муҥутуур кыайыылааҕынан 9 кылаас үөрэнээччитэ Слепцов Кирилл буолла. 2 үрдэл – Старостин Алеша, 10 кылаас, 3 үрдэл – Слепцов Георгий, 8 кылаас үөрэнээччилэрэ. Анал ааттар: “Өркөн өй» — Самойлов Саян, 7 кылаас үөрэнээччитэ, ”Талба талаан” – Наумов Георгий, 6 кылаас, “Байанайдаах эр бэрдэ” – Старостин Алеша, 10 кылаас, “Бэргэн ытааччы” – Слепцов Кирилл, 9 кылаас уолаттара буоллулар. Бу күрэххэ кылаастар бэйэлэрин уолаттарыгар спонсордаатылар. Кыттыбыт аҕаларга Станислав Степановичка, элбэх оҕолоох ыал аҕатыгар Илья Петровичка үтүө холобуру көрдөрбүттэригэр, ону таһынан аҕалар оннуларыгар кэлэн кыттыбыт убайдарга Михаил Боярскайга, Владимир Сыроватскайга, Иннокентий Старостинҥа махтанабыт. Кистэл буолбатах, оскуола ыытар уопсастыбаннай тэрээһиннэргэ эр киһи кыттара олус сэдэх буолла. Инникитин оскуолабыт ыытар тэрээһинигэр аҕалары эрэнэ күүтэбит. Эр киһи бас- көс, дурда-хахха буоларын кэнчээри ыччакка үтүө холобуру биэрэн уһуйуохтара диэн эрэнэбит. Барыгытыгар үтүөнү, туох баар үчүгэйи-кэрэни баҕарабыт!
Надежда Слепцова, Кустуур орто оскуолатын дириэктэри иитэр үлэҕэ солбуйааччыта