В.Н. Стручков аатынан оҕо спортивнай оскуолатыгар спортивнай сезон ГТО нуорматын туттарыыттан саҕаланна.
Үөрүүлээх тэрээһиҥҥэ эти-хааны эрчийэр спортивнай оскуола тренердэригэр үөрүүлээх быһыыга-майгыга наҕараадалары туттардылар. Ол курдук, көҥүл тустуу көрүҥэр тренер Петр Стручковка «Учууталлар учууталлара” үрдүк бэлиэ, дуобакка уонна саахымакка тренергэ Павел Абрамовка улуус Аҕа баһылыгын Иннокентий Стручков грамотата туттарыллыбыта долгутулаах түгэн буолла.
Салгыы эҕэрдэ тылы Н.Г. Чернышевскай аатынан Бүлүүтээҕи педагогическай колледж дириэктэрэ Иван Алексеев тутан, спортивнай сезон арыллыбытынан итиитик-истиҥник эҕэрдэлээтэ уонна оҕо спорда сайдыытыгар үрдүк таһымнаах үлэ ыытылларын, кыракый спортсменнар элбэхтэрин, ол аата спортка сөптөөх болҕомто уурулларын бэлиэтээтэ. Биир дойдулаахпытыгар, оҕо спортивнай оскуолатыгар дириэктэринэн үлэлээбит, билигин Бүлүүтээҕи педагогическай колледж дириэктэрин бастакы солбуйааччытынан үлэлиир Дмитрий Саввиновка тыл бэрилиннэ. Дмитрий Олегович спортка биһиги улууспут оҕолоро үрдүк ситиһиилээхтэрин, соторутааҕыта ыытыллыбыт “Боотурдар оонньууларыгар” эдэр бөҕөстөрбүт дьоһун утарсыыны көрдөрбүттэрин, өссө күүскэ дьарыктанан үрдүк кирбиилэри дабайалларыгар баҕарда.
Оҕо спортивнай оскуолатын эдэр тренеригэр, оҕолору хотугу многоборьеҕа дьарыктыыр биир дойдулаахпытыгар Семен Стручковка алгыс тылы туһаайан туран, эҕэрдэ суругу туттардылар.
Маны таһынан ааспыт сылга ГТО нормативтарын үрдүк көрдөрүүлээх туттарбыт оскуола үөрэнээччилэригэр, чуолаан үрүҥ көмүс бэлиэни ылбыт Давид Другин, боруонса бэлиэ хаһаайыттара Эрчим Горохов, Амелия Иванова дастабырыанньанан наҕараадаланнылар.
Бэлиэтээн эттэххэ, ГТО нормативтарын ситиһиилээхтик туттарбыт оскуола үөрэнээччилэригэр үөрэххэ киирэллэригэр биир кэлим судаарыстыбаннай эксээмэҥҥэ эбии баал ааҕыллар, онтон үлэһит дьон нолуоктан босхолоноллор, үлэлэригэр үс күн өрөбүл ылаллар.
Маны таһынан спортка ситиһиилэрин иһин «Боотурдар оонньууларын” призердара Еремей Рожин, Егор Никитин, Аким Слепцов уонна уолаттар тренердэрэ Петр Стручков бочуотунай грамотанан бэлиэтэннилэр.
Үөрүүлээх чаас түмүктэммитин кэннэ ГТО нормативтарын туттарыы саҕаланна. Спорт түһүлгэтигэр оскуола үөрэнээччилэрэ, эдэр ыччаттар, тэрилтэлэр үлэһиттэрэ мустаннар, саастарынан категорияларга арахсан, араас көрүҥнэргэ бэйэлэрин тургутан көрдүлэр. Түмүккэ уопсайа 40-ча киһи кыттыбытыттан оскуола үөрэнээччилэригэр Еремей Рожин, Ефим Старостин, Павел Слепцов, Афанасий Никитин, Амелия Иванова, Эркин Слепцов, Костя Ушницкий, эр дьоҥҥо Григорий Петухов, Христофор Тутукаров, Семен Стручков үрдүк көрдөрүүлэри ситиһэн, бочуотунай грамотанан наҕараадаланнылар.
Эрчиллиҥ, чэгиэн-чэбдик буоларга дьулуһуҥ!
Сардаана Копырина