«Гарпан» этнокултуурунай киин үлэһиттэрэ тэрийэн ыыппыт Аһымал кэнсиэр улууспут киинин талба талааннаахтарын, үтүө санаалаах дьонун-сэргэтин түмтэ.
Кэнсиэри Надежда Дьячковская уонна Николай Суханов саҥаран – иҥэрэн ыыттылар.
«Үпэндьэл”, “Генулчал”, Оҕо саас киинин, «Хаарчаана» уһуйаан, Р.И.Шадрин аатынан орто оскуола үөрэнээччилэрэ, Галина Слепцова, Татьяна Сотрудникова, Алексан Аммосов, Ньургун Боярскай, Михаил Сотрудников, Давид, Егор Другиннар ылбаҕай ырыаларын, имигэс үҥкүүлэрин бэлэхтээтилэр.
Тэрээһиҥҥэ анал дьайыы бэтэрээнэ, рядовой Вячеслав Пинигин махтал тыллара мустубут дьону уйадытта.
Үтүө санаа холбукатыгар кэлбит дьон сэмэй көмөлөрүн уктулар.
Кэнсиэр кэмигэр култуурунай киин үлэһитэ Мария Аммосова оҥорбут илиигэ кэтэр харысхала аукциоҥҥа турбутун Саккырыыр оскуолатын 4 кылааһын үөрэнээччитэ Виан Горохов 2200 солк. туруоран ылла. Виан бу харчыта төрөөбүт күнүгэр бэлэҕэ буолар. Кырачаан бизнесменнар, элбэх оҕолоох Аммосовтар кэнчээрилэрэ бэйэлэрэ оҥорбут сахарнай ваталарын атыылаан эбиммит харчыларын анал дьайыы байыастарыгар биэрэннэр кылааттарын киллэрдилэр. Үтүө, сайдам, бэриниилээх санаалаах кэнчээрилэр үүнэн эрэллэрэ олохпут кэскиллээх, дойдубут модун тирэхтээх буоларын бигэргэтэр, эрэли үөскэтэр.
— «Күндү биир дойдулаахтарым! Үүммүт саҥа сылынан бука барыгытын истиҥник эҕэрдэлиибин! Бүгүҥҥү аһымал тэрээһин, ыытыллар үтүө бачыымнар анал дьайыы байыастарыгар дьоһун өйөбүл. Сэрии толоонугар сырыттахха, дьиэ аһа, дойдуҥ дьонун истиҥ тыллаах суруктара, тигэн ыыппыт таҥастара ураты сылааһынан илгийэр, дойдуну санатар буолар. Маннык кэһиилэр күүскэр күүс, сэниэҕэр сэниэ эбэр курдуктар. Үтүө санаалаах бар дьоммутугар улахан махталбын этэбин. Ыалдьымаҥ, хомойумаҥ. Эйэлээх олох хайаан да сотору кэминэн кэлиэҕэ диэн эрэл санаалаах түмсүүлээхтик, этэҥҥэ сылдьыахха, үлэлиэххэ-хамсыахха, олохтон үөрүөххэ!»
«Гарпан» этнокултуурунай киин дириэктэрэ Раиса Старостина: «Анал дьайыы байыастарын өйүүр үтүө санаа кэнсиэригэр уопсайа 50 650 солк., ол иһигэр кэнсиэркэ киирии билиэттэн 31 750 солк., үтүө санаа холбукатыгар 16 700 солк., аукционтан 2200 солк. харчы киирбитэ улуус дьаһалтатыгар туттарылынна.
Түгэнинэн туһанан, дьоро киэһэҕэ кыттыбыт талааннаах ырыаһыттарбытыгар, аатырбыт чаҕылхай үҥкүү ансаамбылларыгар, кэнчээри ыччаттарбытыгар улахан махталбытын тиэрдэбит!»
Дьонноох киһи тутайбат! Түмсүүнэн, биир сомоҕо санаанан или-эйэни түстүөххэ, чэчирии сайдыахха!
Яна Рожина
Хаартыскаҕа түһэрдэ: Семен Слепцов