Р.И. Шадрин аатынан Саккырыыр орто оскуолата Саҥа Дьыллааҕы алыптаах кэрэ эйгэҕэ куустурда. Улуус бары оскуолаларыттан бастыҥтан бастыҥ, чулууттан чулуу үөрэнээччилэр, актыбыыстар, спортсменнар уонна анал байыаннай дьайыы кыттыылаахтарын оҕолоро улуус баһылыгын харыйатыгар тоҕуоруһа муһуннулар.
Ол курдук, мэлдьи инники күөҥҥэ сылдьар 40 оҕо Аҕа баһылык харыйатыгар кыттыыны ылла, ол иһигэр улуустааҕы Оҕо саас кииниттэн 7, улуустааҕы оҕо спортивнай оскуолатыттан 5, Р.И. Шадрин аатынан Саккырыыр орто оскуолатыттан 18, А.С. Садовников аатынан Дьарҕаалаах оскуолатыттан 1, И.Н. Слепцов аатынан Кустуурдааҕы орто оскуолаттан 9 оҕо.
Бу күн кыттааччылар этэрээттэринэн арахсан, хамаандалар сомоҕолоох буолууларыгар трениҥҥа кытыннылар. Салгыы Эбээн-Бытантай национальнай улууһун Аҕа баһылыгын солбуйааччылара Александра Иванованы, Саргылана Петрованы кытары төгүрүк остуолга көрүстүлэр уонна саамай күүтүүлээх, долгутуулаах тэрээһиҥҥэ – Баһылык Харыйатыгар көрү-нары көҕүлүттэн туттулар.
Улуус Аҕа баһылыга Иннокентий Стручков үөрүүлээх дьоро күҥҥэ мустубут кэнчээри ыччаттарга итии-истиҥ эҕэрдэтин туһаайда: «Күндү улууспут кэнчээри кэскилэ, киэн туттар ыччат дьоно! Кэлэн иһэр саргылаах саҥа дьылынан, соргулаах саҥа дьолунан! Ааһан эрэр 2025 сылбыт хас биирдиибитигэр умнуллубат үтүө күннэри, долгутуулаах түгэннэри бэлэхтээтэ. Элбэх сыал-сорук туруоруллан олоххо киирдэ. Ол курдук, Аҕа дойдуну Көмүскээччи сылын иитинэн бэрт элбэх тэрээһиннэр ыытылыннылар. Дойдубутугар буола турар балаһыанньа уустук, ол эрээри сомоҕолоох, түмсүүлээх, күүстээх норуот буоламмыт биһиги ханнык баҕар харгыстары, кыһалҕалары туоруохпут диэн эрэнэбит.
Күндү доҕоттор! Эһиги билиигит-көрүүгүт, олоххо тардыһыыгыт күүһүрэ турдун, кыайыыларгытынан үөрдэ, киэн тутуннара, төрөөбүт нэһилиэккитин, улуускутун ааттата сылдьыҥ.
2026 сылга санаабыккыт сатаннын, ылсыбыккыт ылыннарыылаах, баҕарбыккыт баһыылаах, үлэҕит үөрүүлээх, дьоҥҥут дьоллоох, доруобуйаҕыт чэгиэн, сырыыгыт кэскиллээх буола турдун!»
Тэрээһин чэрчитинэн улуус бастыҥ үөрэнээччитин биллэрбиттэрэ ордук долгутуулаах түгэн буолла. Ол курдук, улуус баһылыга Иннокентий Стручков бары үөрэнээччилэри, учууталлары кэлэн иһэр Саҥа дьылынан эҕэрдэлээн туран, Саккырыыр орто оскуолатын 11 кылааһын үөрэнээччитигэр Альберт Колесовка «Бастыҥ үөрэнээччи» үрдүк ааты туттарбыта дохсун ытыс тыаһынан доҕуһуолланна!
«Бастатан туран, биир дойдулаахтарбын кэлэн иһэр Саҥа дьылынан эҕэрдэлиибин! Доруобай буолуҥ, анал дьайыы тохтоотун! Уонна махталбын этиэм этэ учууталларбар! Мин 1 кылаастан туйгуннук үөрэнэбин, ордук нуучча, английскай, эбээн тылларын, физика уонна физкультура предметтэрин сөбүлүүбүн.
Оҕолорго баҕарабын үөрэхтэригэр кыһаллалларыгар, үөрэҕи булгуччулаах үлэҥ, хаачыстыбалаахтык толоруохтаах эбээһинэһиҥ курдук ылыныахтааххын дии саныыбын,» — диэн Альберт санаатын үллэһиннэ.
Сардаана Копырина
Хаартыскаҕа түһэрдэ Семен Слепцов