Эбээн-Бытантай улууһун кииннэммит бибилэтиэкэтин иһинэн тэриллэн айымньылаахтык үлэлии-хамсыы сылдьар «Үс кут” хоһоон айааччылар уонна хоһоону сэргээччилэр түмсүүлэрэ 2025 с. саҕаланыаҕыттан хас да тэрээһини ыытта.
Биһиги түмсүүбүтүгэр араас дьарыктаах, үлэлээх-хамнастаах дьон түмсэммит бэйэбит кыахпытынан ким кинигэ таһаартаран, ким олохтоох хаһыакка бэчээттэнэн айымньыларбытын ааҕааччы дьүүлүгэр таһаара сатыыбыт.
Бу күннэргэ өрөспүүбүлүкэбитигэр саха тылын уонна төрүт култууратын учууталларын III-с сийиэһин көрсө “Үс кут” түмсүү кыттыылаахтара Саккырыырдааҕы орто оскуола үрдүкү кылаастарын (8-11 кыл.) үөрэнээччилэрин кытта сэтинньи 21 күнүгэр көрүстүбүт.
Көрсүһүүгэ хас да кинигэ ааптара Вера Иванова – Айкыыма, Полина Ефимова – Туйгууна уонна мин бэйэбит хоһооннорбутун оҕолорго ааҕан иһитиннэрдибитю
Биһиги сыалбыт диэн оҕолорго ийэ тыл сүмэтин уонна ийэ тылга тапталы иҥэрии, төрүт норуокка ытыктабылы үөскэтии.
Аактабай сааланы толору олорбут оҕолор биһиги айымньыларбытын сүрдээх болҕомтолоохтук иһиттилэр.
Бу оҕолор истэриттэн баҕар хойутуу да биир эмит оҕо хоһоон дуу, кэпсээн дуу суруйуунан дьарыктанан бардаҕына биһиги сырыыбыт иччитэххэ хаалбатах эбит диэхпит. Көрсүһүү түмүгэр уопсай өйдөбүнньүк хаартыскаҕа түстүбүт.
Баҕа санаа: Түмсүүбүт өссө тэнийэн, хас биирдии киһи “Үс кута» уһуктан, ийэ тылын сэргээн-сэҥээрэн кинигэ, хаһыат доҕордонноҕуна саха тыла мөлтөөбөккө-ахсаабакка сибэкки курдук сириэдийэн-тиллэн хас биирдии сүрэххэ тылыннаҕына күннээҕи тылбыт-өспүт киэргэйиэ диэн эрэнэбит.
Түмсүүбүт салайааччыта Саккырыырдааҕы кииннэммит бибилэтиэкэ сэбиэдиссэйэ, Саха Өрөспүүбүлүкэтин култууратын үтүөлээх үлэһитэ Лидия Софроновна Сыроватская түмсүү үлэтин сатабыллаахтык салайан араас көрсүһүүлэргэ, биэчэрдэргэ кыттыыбытын дьаһайан-сүрүннээн ыытар.
“Үс кут” айар түмсүүбүтүгэр өссө да элбэх айар куттаах улуус дьоно-сэргэтэ кыттыахтара диэн эрэнэбит.
Светлана Горохова – Харысхаана, хаһыат уопс. кэрр.