Үүнэ-сайда тур, төрөөбүт нэһилиэкпит!

Бэс ыйын 13 күнүгэр кэрэ айылҕалаах Кустуурбут туонатыгар биир үөрүүлээх түгэн буолла. Арҕаа эҥэргэ саҥа хочуолунайбыт акылаата түһэн сиэр-туом тутуһан сирбитин-уоппутун арыылаах алаадьыннан, саламаатынан, саамал кымыһынан айах тутан аһатан, бары күлэн-үөрэн, өрө көтөҕүллэн сырыттыбыт. 

Кустуур нэһилиэгин олохтоохторо күн ортото тоҕуоруһа мустан, нэһилиэкпит кытыытыгар саҥа хочуолунайбыт тутулла турар сиригэр үөрэн-көтөн тиийдилэр. Аныгы кэм ирдэбилигэр сөп түбэһиннэрэн, тыа сирэ социальнай -экономическай сайдыытыгар туһаайан, судаарыстыба үбүнэн улахан тутуу бара турар. Туохтааҕар да сүрүн кыһалҕабыт дьоммут-сэргэбит сылаас дьиэҕэ нус-хас олороллоругар, аны күһүн хочуолунайбыт үлэҕэ киириитэ.

Баһылыкпыт Роберт Афанасьевич, Светлана Черепанова, тутуу прораба үөрүүлээх түгэнинэн эҕэрдэлээн тыл эттилэр. Уонна биһиги, кустуурдар маннык бэлиэ түгэннэргэ куруук ыллыыр, таптыыр ырыабытын «Мин Кустуурум» Стас Самойловы кытта бары ылластыбыт.

Биһиги дьоммут хаһан да, ханна да буоллар, дойдуларын туһугар утары кэлэн үтүө баҕа санааларынан салайтаран тутуу үлэһиттэрин тото-хана аһатан, араас ас-үөл эгэлгэтин бэлэмнээн аҕалан биэрэннэр, хоту ыраах үлэлии кэлбит тутууннан дьарыктанар үлэһиттэри олус үөртүлэр. Үлэһиттэр махталларын биллэрэн тэҥҥэ ыллаһан, һээдьэлээн тарҕастылар.

Ким саҕалыыр — ол бүтэриэхтээх,
сир быйаҥнаах — киһи сатабыллаах!

Кустууртан биһиги уопс.кэрр. Тамара Шадрина