Сэтинньи 8 күнүгэр Оҕо саас киинэ тэриллибитэ 30 сыллаах үбүлүөйдээх кэнсиэрэ үрдүк таһымнаахтык буолан ааста.
Бу кэрэ-бэлиэ тэрээһини бэйэлэрин эҕэрдэ нүөмэрдэринэн Оҕо саас киинин иитиллээччилэрэ, үлэһиттэрэ, выпускниктара, оҕолор төрөппүттэрэ киэргэттилэр. Ким ырыа ыллаан, ким үҥкүүлээн көрөөччүлэр болҕомтолорун тартылар.
Маны таһынан дойдубут араас муннуктарыгар үөрэнэр, үлэлиир выпускниктар бэйэлэрин эйэҕэс эҕэрдэлэрин видео нөҥүө устан ыыппыттарын олус сэргээтибит, хайҕаатыбыт.
Тус бэйэм көрүүбүн үллэстэр эбит буоллахпына, Оҕо саас киинигэр үлэлиир кэрэ аҥардар хотугу үҥкүүлэрэ уонна төрөппүттэр бэрт сэргэх, киһи сүргэтин көтөҕөр тэтимнээх үҥкүүлэрэ куппун-сүрбүн тутта. Киһи тэбис-тэҥҥэ ойон-тэйэн үҥкүүлээн барыан санаата киирэр, оннук тыыннаах эйгэлээх, эрчимнээх!
Кыракый ырыаһыттар куоластара киһи дууһатын кылын таарыйар гына уйулҕалаахтык, истиҥник дуорайда.
Оҕо саас киин үлэһиттэрэ хас биирдии устуулга көрөөччүлэргэ анаан алгыстаах ыраастанар оту оҕолор хомуйан оҥорбуттарын бэрт үчүгэйдик кичэйэн, тастаан ыйаабыттара ураты көстүү буолла.
Ити курдук, тапталлаах Оҕо саас кииммит 30 сыллаах үбүлүөйүнэй кэнсиэрэ көрөөччүлэр болҕомтолорун, сэҥээриилэрин ылан, уостан түспэт сонун буолла.
Марианна Слепцова